కోల్డ్‌వార్‌.. హాట్‌వార్‌.. ఏదీమాకొద్దు!

యుద్ధం కోరుకోవడంలేదన్న చైనా అధ్యక్షుడు జిన్‌పింగ్‌

బీజింగ్‌: ఓవైపు భారత్‌ సరిహద్దులో చైనా బలగాల దూకుడుతో ఉద్రిక్త పరిస్థితులు, మరోవైపు అగ్రరాజ్యం అమెరికాతో కోల్డ్‌ వార్ కొనసాగుతున్న వేళ చైనా అధ్యక్షుడు శాంతి మంత్రం జపించారు. ఐరాస సర్వసభ్య సమావేశంలో జిన్‌పింగ్‌ కీలక వ్యాఖ్యలు చేశారు. తాము యుద్ధాన్ని కోరుకోవడంలేదని, కోల్డ్‌వార్‌, హాట్‌ వార్‌.. ఏదీ తమకు అవసరం లేదన్నారు. 75వ యూఎన్‌ సర్వసభ్య సమావేశం సందర్భంగా రికార్డు చేసిన వీడియో సందేశంలో ఆయన ఈ విషయాలను వెల్లడించారు. దేశాల మధ్య బేధాభిప్రాయాలు ఉండటం సహజమేనని, అయితే, వాటిని చర్చల ద్వారా పరిష్కరించుకోవాలన్నారు. 

అభివృద్ధి చెందుతున్న దేశమైన చైనా.. శాంతియుత, సహకార సంబంధమైన అభివృద్ధికి కట్టుబడి ఉందన్నారు.  తమ దేశం ఎప్పటికీ విస్తరణ, ఆధిపత్యాన్ని కోరుకోదని చెప్పారు. ఇతర దేశాలతో తమకు ఉన్న విభేదాలను తగ్గించుకుంటామని, సంభాషణలు, చర్చల ద్వారా వివాదాలను పరిష్కరించుకుంటామన్నారు. ఐక్య రాజ్యసమితి సర్వసభ్య సమావేశం ఈ రోజు ప్రారంభమైంది. కరోనా నేపథ్యంలో ఆయా దేశాల అధినేతలు ఈ సమావేశానికి వర్చువల్‌ పద్ధతిలోనే తమ సందేశాలను పంపారు.