Jharkhand: నోరు కుట్టేసి.. కాళ్లూ చేతులూ కట్టేసి..

ఝార్ఖండ్‌లోఅమానుషం

పలామూ: నోరు కుట్టి, కాళ్లూ చేతులూ కట్టేసి ఓ వృద్ధుడిని రైల్వే ట్రాక్‌పై పడేసిన అమానవీయ ఘటన ఝార్ఖండ్‌లో చోటుచేసుకుంది. ఆస్తి వివాదం నేపథ్యంలో బాధితుడి రెండో భార్య కొడుకే ఈ ఘోరానికి పాల్పడ్డాడు! పలామూ జిల్లాలోని భీతిహార్వాకు చెందిన భోలారామ్‌కు ఇద్దరు భార్యలు. మొదటి భార్యకు ఆరుగురు పిల్లలుండగా, రెండో భార్యకు ఓ కొడుకు ఉన్నాడు. భోలారామ్‌ చెప్పులు కుడుతూ కుటుంబాన్ని పోషిస్తున్నాడు. అయితే రెండో భార్య కారణంగా కుటుంబంలో ఆస్తి వివాదం తలెత్తింది. ఈ విషయమై పలుమార్లు పంచాయితీ కూడా జరిగింది. అక్కడ జరిగిన నిర్ణయంతో సంతృప్తి చెందని రెండో భార్య కుమారుడు... మంగళవారం రాత్రి తన తండ్రి నోరు కుట్టి, కాళ్లూచేతులు కట్టేసి రైల్వే ట్రాక్‌పై పడేశాడు. అయితే ఆ సమయంలో అటుగా రైళ్లు రాలేదు. ఇంతలో గ్రామస్థులు ఘటనా స్థలానికి చేరుకుని భోలారామ్‌ నోటి కుట్లు కత్తిరించారు. ఉంటారి రోడ్‌ ఠాణా పోలీసులు కుటుంబ సభ్యుల మధ్య రాజీ కుదిర్చినట్టు తెలిసింది.