France Vs Australia: ఆస్ట్రేలియా ప్రధాని అబద్ధాలు చెప్పారు..!

 మాక్రోన్‌ వ్యాఖ్యలతో ముదిరిన ఫ్రాన్స్‌-ఆస్ట్రేలియా వివాదం

ఇంటర్నెట్‌డెస్క్‌ : ఫ్రాన్స్‌-ఆస్ట్రేలియా మధ్య జలాంతర్గాముల కాంట్రాక్టుకు సంబంధించిన వివాదం మరింత ముదిరింది. రోమ్‌లో జీ-20 భేటీ ముగిసిన తర్వాత ఫ్రాన్స్‌ అధ్యక్షుడు ఇమ్మానియేలు మాక్రోన్‌ మాట్లాడుతూ ఆస్ట్రేలియా ప్రధాని స్కాట్‌ మారిసన్‌ తనతో అబద్ధమాడారని వ్యాఖ్యానించారు. ఈ వ్యాఖ్యలు దుమారం రేపాయి. ఆస్ట్రేలియా ప్రధాని మారిసన్‌ మాత్రం ఈ వ్యాఖ్యలను తిరస్కరించారు. ‘మాక్రోన్‌ వ్యాఖ్యలు కేవలం నన్ను అన్నట్లు కాకుండా.. ఆస్ట్రేలియా మొత్తాన్ని అన్నట్లు ఉన్నాయి. ఆ ఆరోపణలు ఎదుర్కోవడానికి నాకు తగినంత సత్తా ఉంది’’ అని మారిసన్‌ పేర్కొన్నారు.  వేధింపులు, దూషణలను ఆస్ట్రేలియా ఏమాత్రం సహించదని పేర్కొన్నారు. 

ఈ ఏడాది సెప్టెంబర్‌లో ఆస్ట్రేలియా-యూకే‌-అమెరికా కలిసి ఆకస్‌ రక్షణ కూటమిగా ఏర్పడ్డాయి. ఈ  ఒప్పందంలో భాగంగా అమెరికా, యూకేలు ఆస్ట్రేలియా అణు జలాంతర్గాలములు సమకూర్చుకొనేట్లు సహకరిస్తాయి. దీంతో అప్పటికే ఫ్రాన్స్‌ నుంచి 12 డీజిల్‌-ఎలక్ట్రిక్‌ జలాంతర్గాములు కొనుగోలు చేసేందుకు ఆస్ట్రేలియా ఒప్పందం చేసుకొంది. ఈ డీల్‌ విలువ 37 బిలియన్‌ డాలర్లు. కానీ, ఆకస్‌ డీల్‌ కారణంగా ఫ్రాన్స్‌-ఆస్ట్రేలియా ఒప్పందం రద్దైంది. దీంతో ఇరు దేశాల మధ్య వివాదం రాజుకొంది. ఆస్ట్రేలియా వెన్నుపోటు పొడిచిందని ఫ్రాన్స్‌ అధ్యక్షుడు ఇమ్మానియేలు మాక్రోన్‌ వ్యాఖ్యానించారు. తాజాగా జీ20 సందర్భంగా మాక్రోన్‌ వ్యాఖ్యలు మరింత ఆజ్యం పోశాయి.