delhi high court: ఏది శాకాహారమో.. మాంసాహారమో చెప్పాలి

గృహోపకరణాలు, దుస్తులపై విధిగా ముద్రించాలని దావా

దిల్లీ: గృహోపకరణాలు, దుస్తులు సహా ప్రజలు ఉపయోగించే అన్ని వస్తువులపై వాటి తయారీలో వాడిన పదార్థాలను సూచించేలా విధిగా శాకాహారం లేదా మాంసాహారం అని ముద్రించేలా ఆదేశాలు జారీ చేయాలంటూ ఓ సంస్థ వేసిన దావాపై దిల్లీ హైకోర్టు గురువారం కేంద్రానికి తాఖీదులు పంపింది. ప్రతి ఒక్కరికీ తాము వాడుతున్న ఉత్పత్తి గురించి తెలుసుకొనే హక్కు, తమ నమ్మకాలను అనుసరించే హక్కు ఉందని, ఈ విషయాన్ని కేంద్రం తీవ్రంగా పరిశీలించాలని తాఖీదులు జారీ చేస్తూ.. న్యాయమూర్తి జస్టిస్‌ విపిన్‌ సంఘి నేతృత్వంలోని ధర్మాసనం కేంద్రానికి సూచించింది. గో సంరక్షణ కోసం పనిచేసే ‘రామ్‌ గౌ రక్షా దళ్‌’ అనే సంస్థ ఈ దావా వేసింది. ఉత్పత్తులపై ముద్రలు లేకపోవడం వల్ల శాకాహారాన్ని పాటించేవారు తమకు తెలియకుండా మాంసాహార ఉత్పత్తులు వినియోగించాల్సి వస్తోందని దావాలో పేర్కొంది.