Drone Attack: అభా ఎయిర్‌ పోర్టుపై డ్రోన్‌ దాడి.. ఓ విమానం ధ్వంసం

24గంటల్లో రెండోదాడి.. ఎనిమిది మందికి గాయాలు.. 

అబా: నైరుతీ సౌదీ అరేబియా లక్ష్యంగా వరుసగా జరుగుతున్న డ్రోన్‌ దాడులు ఆందోళన కలిగిస్తున్నాయి. తాజాగా అభా విమానాశ్రయంపై జరిగిన మరో డ్రోన్‌ దాడిలో ఎనిమిది మంది గాయపడగా.. ఓ పౌర విమానం ధ్వంసమైనట్టు స్థానిక టీవీ ఛానల్‌ వెల్లడించింది. యెమెన్‌ తిరుగుబాటుదారులతో సౌదీ సేనల యుద్ధం కొనసాగుతున్న నేపథ్యంలో అబా విమానాశ్రయంపై ఈ దాడులు చోటుచేసుకోవడం గమనార్హం. అయితే, ఈ దాడులు ఎవరు చేశారనే విషయం మాత్రం ఇంకా తెలియరాలేదు. ఈ దాడులకు బాధ్యత వహిస్తూ ఏ సంస్థా ఇంతవరకు ప్రకటన చేయలేదు. గడిచిన 24గంటల వ్యవధిలోనే అభా విమానాశ్రయంపై రెండు దాడులు జరిగాయి. తొలుత జరిగిన దాడిలో ఎలాంటి నష్టం జరగనప్పటికీ.. తాజా దాడుల్లో మాత్రం ఎనిమిదిమందికి గాయాలు కావడంతో పాటు ఓ విమానం ధ్వంసమైంది.