‘భారత్‌ అద్భుత విజయాల్ని అందుకోవాలి’

అమెరికా

వాషింగ్టన్‌: వివిధ రంగాల్లో భారత్‌తో కలిసి పనిచేయడానికి సిద్ధంగా ఉన్నామని అమెరికా తెలిపింది. ముఖ్యంగా భద్రతాపరమైన అంశాల్లో ఇరు దేశాల మధ్య సహకారం నానాటికీ దృఢమవుతోందని అభిప్రాయపడింది. తాజా గణతంత్ర దినోత్సవం నేపథ్యంలో శుభాకాంక్షలు తెలిపిన అమెరికా.. ఈ దశాబ్దంలో భారత్‌ అద్భుతమైన విజయాల్ని నమోదు చేయాలని ఆకాంక్షించింది. నీరు, వాణిజ్యం, అంతరిక్షం, ఇంధనం, భద్రత తదితర రంగాల్లో ఇరు దేశాల మధ్య సహకారాన్ని మరింత బలోపేతం చేసే దిశగా ముందుకు సాగుతున్నామని అమెరికా విదేశాంగశాఖలోని దక్షిణ, మధ్య ఆసియా విభాగం స్పష్టం చేసింది. తాజా గణతంత్ర వేడుకల్లో భారత్‌ ప్రదర్శించిన సైనిక పాటవం ఇరు దేశాల మధ్య బంధానికి సూచికగా నిలిచిందని అభిప్రాయపడింది. చినూక్‌, అపాచీ హెలికాప్టర్లను అమెరికా నుంచి దిగుమతి చేసుకున్న విషయం తెలిసిందే. వీటిని తాజా గణతంత్ర వేడుకల్లో ప్రదర్శించారు.