భోపాల్‌లో కూలిన రైల్వేస్టేషన్‌ పైవంతెన

ప్లాట్‌ఫాంపై వేచిఉన్న ప్రయాణికులకు గాయాలు

భోపాల్‌: రైలు రాక కోసం ప్లాట్‌ఫాంపై వేచిచూస్తున్న ప్రయాణికులపై పైవంతెన కూలిన ఘటన మధ్యప్రదేశ్‌లోని భోపాల్‌ రైల్వే స్టేషన్‌లో చోటుచేసుకుంది. గురువారం ఉదయం రైల్వేస్టేషన్‌లో మూడో ప్లాట్‌ ఫాంపై ఉన్న పాదచారుల వంతెనలోని కొంతభాగం ఒక్కసారిగా కుప్పకూలింది. ఈ ఘటనలో 9 మంది ప్రయాణికులకు గాయాలయ్యాయి. క్షతగాత్రులను ఆస్పత్రికి తరలించి చికిత్స అందిస్తున్నారు. ప్రమాదం జరిగిన సమయంలో తక్కువ మంది అక్కడ ఉండటంతో పెను ప్రమాదం తప్పిందని స్థానికులు చెబుతున్నారు. ఈ ఘటనపై విచారణకు ఆదేశించామనీ.. బాధ్యులపై చర్యలు తీసుకుంటామని రైల్వే స్టేషన్‌ ఉన్నతాధికారులు తెలిపారు.