ప్రధాని మోదీ విదేశీ పర్యటనల ఖర్చులివే!

దిల్లీ: భారత ప్రధాని నరేంద్రమోదీ గత ఐదేళ్ల కాలంలో చేసిన విదేశీ పర్యటనల ఖర్చుల వివరాల్ని కేంద్ర విదేశాంగ శాఖ బుధవారం వెల్లడించింది. గత ఐదేళ్లలో ఆయన పర్యటనలకు దాదాపు రూ.446.52 కోట్లు ఖర్చు అయినట్లు తెలిపింది. ఈ మేరకు కేంద్ర విదేశాంగ సహాయ మంత్రి వీ మురళీధరన్‌ లోక్‌సభలో ఓ సభ్యుడు అడిగిన ప్రశ్నకు బదులిచ్చారు. మంత్రి స్పందిస్తూ.. గత ఐదేళ్లలో మోదీ విదేశీ పర్యటనలకు రూ.446.52 కోట్లు ఖర్చయినట్లు తెలిపారు. వరుసగా ఐదేళ్లలో ఏ ఏడాది ఎంత ఖర్చు చేశారనే విషయాన్ని కూడా వెల్లడించారు. ఈ ఖర్చు మొత్తం విమానాల ఛార్జీలతో కలుపుకుని అని చెప్పారు. ఆయన ఇచ్చిన సమాచారం ప్రకారం.. ప్రధాని పర్యటనలకు 2015-16 సంవత్సరానికి గానూ రూ.121.85 కోట్లు, 2016-17 సంవత్సరానికి గానూ రూ.72.52 కోట్లు, 2017-18కి గానూ రూ.99.90 కోట్లు, 2018-19కి గానూ రూ.100.02 కోట్లు, 2019-20 కి గానూ రూ.46.23 కోట్లు ఖర్చు పెట్టినట్లు తెలిపారు.