Updated : 02/04/2021 09:07 IST

కరోనా ఉద్ధృతిపై ఊపిరితిత్తుల  ఉష్ణోగ్రత ప్రభావం

  కొత్త మందుల రూపకల్పనకు మార్గం సుగమం 

లండన్‌: ఎగువ, దిగువ శ్వాసకోశ వ్యవస్థల్లోని సహజసిద్ధ ఉష్ణోగ్రత వైరుధ్యాలు కరోనా ఉద్ధృతిపై ప్రభావం చూపుతున్నాయని శాస్త్రవేత్తలు పేర్కొన్నారు. ఈ వైరస్‌ పునరుత్పత్తి, అనంతరం మానవ రోగ నిరోధక వ్యవస్థను క్రియాశీలం చేయడంపైన వీటి ప్రభావం ఉంటోందని తెలిపారు. కొవిడ్‌-19కు కొత్త చికిత్స విధానాలు, నివారణ ప్రక్రియలను రూపొందించడానికి ఈ పరిశోధన ఫలితాలు దోహదపడతాయని పేర్కొంది. స్విట్జర్లాండ్‌లోని బెర్న్‌ విశ్వవిద్యాలయ శాస్త్రవేత్తలు ఈ ఆవిష్కారం చేశారు. పరిశోధనలో భాగంగా శాస్త్రవేత్తలు.. తాజా కొవిడ్‌-19 కారక సార్స్‌-కోవ్‌-2, 2002-03లో వచ్చిన సార్స్‌-కోవ్‌ వైరస్‌ల ఇన్‌ఫెక్షన్‌ తీరుతెన్నులను పోల్చి చూశారు. ఈ రెండు రకాల వైరస్‌ల మధ్య జన్యుపరంగా చాలా సారూప్యతలు ఉన్నప్పటికీ వాటి తీరులో కొన్ని ముఖ్యమైన వైరుధ్యాలూ ఉన్నాయని వారు చెప్పారు. 

* 2002-03లో వచ్చిన వైరస్‌.. తీవ్రస్థాయి వ్యాధిని కలిగించింది. దిగువ శ్వాసకోశ వ్యవస్థలో ఇన్‌ఫ్లమేషన్‌కు ఇది కారణమైంది. 

* ప్రస్తుత కొవిడ్‌ కారక సార్స్‌-కోవ్‌-2 మాత్రం చాలా వరకూ నాసిక కుహరం, శ్వాసనాళం సహా ఎగువ శ్వాస మార్గంలో ఇన్‌ఫెక్షన్‌ను కలిగిస్తోంది. 

* సార్స్‌ వైరస్‌తో ఇన్‌ఫెక్షన్‌ సోకినవారిలో లక్షణాలు బయటపడిన తర్వాతే వారి ద్వారా వ్యాధి వ్యాప్తి జరిగింది. ఫలితంగా ఇన్‌ఫెక్షన్‌ వ్యాప్తిని అడ్డుకోవడం సులువైంది. 

* సార్స్‌-కోవ్‌-2 మాత్రం.. లక్షణాలు కనిపించడానికి ముందే సదరు వ్యక్తి నుంచి ఇతరులకు వ్యాపిస్తోంది. 

ఉష్ణోగ్రత వైరుధ్యాలే కారణం.. 

ఎగువ శ్వాస మార్గాల్లో 33 డిగ్రీల సెల్సియస్‌ ఉష్ణోగ్రత ఉంటుందని, అక్కడ కొవిడ్‌ వైరస్‌ పునరుత్పత్తి చెందడానికి ఈ ఉష్ణోగ్రత దోహదపడుతోందని శాస్త్రవేత్తలు తేల్చారు. దిగువ ఊపిరితిత్తుల్లోని 37 డిగ్రీల సెల్సియస్‌ ఉష్ణోగ్రతతో పోలిస్తే ఇక్కడే వైరస్‌ ఎక్కువగా తన సంఖ్యను పెంచుకుందని తెలిపారు. కొవిడ్‌ వైరస్‌కు భిన్నంగా.. సార్స్‌-కోవ్‌ మాత్రం ఉష్ణోగ్రతల్లోని వైరుధ్యాల ప్రభావానికి లోను కాలేదని తేల్చారు. 

దిగువ శ్వాసకోశ వ్యవస్థతో పోల్చినప్పుడు.. ఎగువ శ్వాసనాళాల్లో సార్స్‌-కోవ్‌-2 వైరస్‌ ఇన్‌ఫెక్షన్‌ను అడ్డుకోవడానికి అక్కడి కణాల్లోని సహజసిద్ధ రోగనిరోధక వ్యవస్థ అంత బలంగా స్పందించలేదని వెల్లడైంది. ఈ ప్రతిస్పందన వ్యవస్థ బలాన్ని బట్టి.. వైరస్‌ పునరుత్పత్తి ఆధారపడి ఉంటుంది. ‘‘ఈ నేపథ్యంలో సార్స్‌-కోవ్‌-2 పునరుత్పత్తి, మానవ రోగనిరోధక యంత్రాంగంపై ఉష్ణోగ్రత ఆధారంగా జరిగే మార్పులను పరిశీలిస్తే.. ఎగువ శ్వాసకోశ వ్యవస్థలోనే ఆ వైరస్‌ ఎక్కువగా పునరుత్పత్తి చెందుతున్నట్లు వెల్లడవుతోంది. ఈ వ్యాధి వ్యాప్తి ఎక్కువగా ఉండటానికి కూడా ఇదే కారణం’’ అని శాస్త్రవేత్తలు తెలిపారు.  

Read latest India News and Telugu News

 Follow us on Facebook, Twitter, Instagram, Koo, ShareChat and Google News. Subscribe our Telegram Channel.

Advertisement

Tags :

మరిన్ని

జిల్లా వార్తలు

సినిమా

మరిన్ని

బిజినెస్

మరిన్ని

క్రీడలు

మరిన్ని

పాలిటిక్స్

మరిన్ని

వెబ్ ప్రత్యేకం

మరిన్ని

జనరల్

మరిన్ని