Covid వాసన పొందడానికి శిక్షణే మేలు

బ్రిటన్‌ శాస్త్రవేత్తల సూచన 

లండన్‌: కొవిడ్‌-19 బారినపడివారికి వాసన చూసే సామర్థ్యం తగ్గిపోతుంటుంది. అయితే ఇలాంటి వారికి స్టెరాయిడ్లను ఇవ్వరాదని బ్రిటన్‌ శాస్త్రవేత్తలు సూచించారు. దానికి బదులు వారికి వాసన సామర్థ్యాన్ని పెంచే శిక్షణ ఇవ్వాలని కోరారు. రోజుకు రెండుసార్లు కనీసం నాలుగు భిన్నరకాల వాసనలను వారికి చూపాలని సూచించారు. ఇలా కొన్ని నెలల పాటు చేయాలన్నారు. ‘‘కొవిడ్‌ వల్ల వాసన సామర్థ్యం కోల్పోయిన వారిలో ఎక్కువ మందికి ఆ సమస్య వెంటనే సమసిపోతోంది. ప్రతి ఐదుగురిలో ఒకరికి మాత్రం 8 వారాల తర్వాత కూడా పరిస్థితి చక్కబడటంలేదు. అలాంటివారికి వైద్యులు కార్టికోస్టెరాయిడ్లను సూచిస్తుంటారు. ఇవి శరీరంలో ఇన్‌ఫ్లమేషన్‌ను తగ్గిస్తుంటాయి. ఆస్థమా వంటి సమస్యలకు వీటిని వాడుతుంటారు. అయితే వీటివల్ల అధిక రక్తపోటు, భావోద్వేగాల్లో వైరుధ్యాలు వంటివి తలెత్తుతుంటాయి. అందువల్ల కొవిడ్‌ బాధితుల్లో వాసన సామర్థ్యాన్ని తిరిగి రాబట్టడానికి ఈ మందులను సూచించడానికి బదులు శిక్షణ కార్యక్రమం వైపు మళ్లాలి’’ అని యూనివర్సిటీ ఆఫ్‌ ఈస్ట్‌ ఆంగ్లియా నిపుణుడు కార్ల్‌ ఫిలిపాట్‌ పేర్కొన్నారు. ఈ శిక్షణ కార్యక్రమం చాలా చౌకైందని, ఎలాంటి దుష్ప్రభావాలకూ ఆస్కారం ఉండదని చెప్పారు.