Pfizer Vaccine: 5-11 ఏళ్ల చిన్నారులకు ఫైజర్‌ టీకా

ఆమోదం తెలిపిన ఈఎంఏ

ద హేగ్‌: ఫైజర్‌ సంస్థ తయారుచేసిన కొవిడ్‌ వ్యాక్సిన్‌ను 5-11 ఏళ్ల వయసు చిన్నారులకు అందించేందుకు యూరోపియన్‌ యూనియన్‌ ఔషధ నియంత్రణ సంస్థ ‘యూరోపియన్‌ మెడిసిన్స్‌ ఏజెన్సీ (ఈఎంఏ)’ అనుమతించింది. దీంతో ప్రాథమిక విద్యను అభ్యసించే లక్షల మంది చిన్నారులకు ఈ టీకా చేరువకానుంది. యూనియన్‌ సభ్య దేశాల్లో ఈ వ్యాక్సిన్‌ను పంపిణీ చేయాలంటే యూరోపియన్‌ కమిషన్‌ కూడా ఆమోదముద్ర వేయాల్సి ఉంది. యూరప్‌ కేంద్రంగా మహమ్మారి మళ్లీ విజృంభిస్తోందని, కట్టడి చర్యలు చేపట్టకుంటే సుమారు 20 లక్షల మంది మృతి చెందే ప్రమాదముందని ప్రపంచ ఆరోగ్య సంస్థ ఇప్పటికే హెచ్చరించింది. ఈ క్రమంలోనే చిన్నారులకు వ్యాక్సిన్‌ అందించేందుకు ఈఎంఏ ఆమోదం తెలపడం గమనార్హం. ఆస్ట్రియా సర్కారు అనుమతుల కోసం నిరీక్షించకుండానే... రాజధాని వియెన్నాలోని 5-11 ఏళ్ల చిన్నారులకు ఇప్పటికే టీకాను అందిస్తోంది.