Vaccine:తొమ్మిదో తరగతి విద్యార్థికి అర గంటలో 2 టీకాలు

తొమ్మిదో తరగతి విద్యార్థి అర గంట వ్యవధిలో రెండు కొవిడ్‌ టీకాలు వేయించుకున్న ఘటన పశ్చిమబెంగాల్‌లోని ఖరగ్‌పుర్‌ సబ్‌ డివిజన్‌లో జరిగింది. దేబ్రాలోని అలోకా పాఠశాలలో చదువుతున్న సాథీదే అనే విద్యార్థి సోమవారం మొదటి టీకా వేయించుకున్నాడు. అనంతరం ఇంటికి వెళ్లకుండా పాఠశాల గేటు వద్ద తిరుగుతూ కనిపించాడు. వ్యాక్సిన్‌ వేసుకోవడానికి భయపడుతున్నాడని భావించిన పాఠశాల సిబ్బంది ధైర్యం చెప్పి, లోపలకు తీసుకెళ్లారు. టీకా వేయడం పూర్తయ్యాక తాను మొదటి టీకా కూడా వేయించుకున్నట్లు మెల్లగా చెప్పగా ఖంగుతిన్నారు. ఇలా ఎందుకు చేశావని వారు ప్రశ్నించగా.. ఒకేరోజు రెండు టీకాలు వేస్తారని అనుకున్నానని అమాయకంగా బదులిచ్చాడు. దీంతో ఆందోళన చెందిన వైద్యులు, ఉపాధ్యాయులు ఆ విద్యార్థిని వెంటనే సమీపంలోని ఆసుపత్రికి తరలించారు. ఆరోగ్యం సాధారణంగా ఉందని నిర్ధారించుకున్న అనంతరం ఇంటికి పంపించారు.