Debt: రూ.28 అప్పు తీర్చేందుకు దేశాలు దాటొచ్చి...

వేల కోట్ల రూపాయల అప్పును ఎగవేసి.. విదేశాలకు వెళ్లిపోతున్న వారి గురించి వింటూనే ఉన్నాం. అలాంటి ఈ కాలంలోనూ రూ. 28 అప్పును చెల్లించడం కోసం విదేశాల నుంచి భారత్‌కు వచ్చారు ఓ వ్యక్తి. 68 ఏళ్ల తర్వాత అప్పును వడ్డీతో సహా తీర్చేశారు. హరియాణాలోని హిసార్‌లో ఈ ఘటన జరిగింది. బీఎస్‌ ఉప్పల్‌ బాల్యం అంతా హిసార్‌లోనే గడిచింది. ఆయన ఇంటి దగ్గర ‘దిల్లీ వాలా హల్వాయి’ అనే దుకాణం ఉండేది. అక్కడ ఎప్పుడూ లస్సీ తాగేవారు. 1954లో ఒకసారి అత్యవసరంగా హిసార్‌ను వీడాల్సి వచ్చింది. అప్పటికే ఆ దుకాణ యజమానికి బీఎస్‌ ఉప్పల్‌.. రూ.28 అప్పు ఉన్నారు. ఆ తర్వాత ఆయన నేవీలో చేరారు. హిసార్‌కు తిరిగి వెళ్లడం కుదరలేదు. పదవీ విరమణ తర్వాత కుమారుడితో కలిసి ఉప్పల్‌.. అమెరికాలో స్థిరపడ్డారు. ఎక్కడున్నా.. అప్పు తిరిగి ఇవ్వడం గురించే ఆలోచించేవారు. అప్పు తిరిగి ఇవ్వాలని నిర్ణయించుకుని భారత్‌కు వచ్చారు. హిసార్‌కు వెళ్లి ఆ దుకాణం యజమానిని కలిశారు. ‘నేను మీ తాతకు రూ.28 అప్పు ఉన్నా. అది తిరిగి ఇవ్వడానికే ఇక్కడకు వచ్చా’ అని చెప్పారు. అప్పును వడ్డీతో సహా తీర్చేశారు బీఎస్‌ ఉప్పల్‌. దుకాణ యజమానికి రూ.10 వేలు ఇచ్చారు.