క్షయను గుర్తించే సరికొత్త పరీక్ష

 త్వరలోనే అందుబాటులోకి.. : మంత్రి

దిల్లీ: క్షయ (టీబీ) వ్యాధిని గుర్తించే సరికొత్త చర్మ పరీక్ష విధానాన్ని త్వరలోనే అందుబాటులోకి తేనున్నట్లు కేంద్ర వైద్య, ఆరోగ్య శాఖ మంత్రి మన్‌సుఖ్‌ మాండవీయ గురువారం వెల్లడించారు. తక్కువ ధరకు అందించే ఈ ‘భారత్‌లో తయారీ’ కిట్‌ ద్వారా అనేక ఇతర దేశాలకూ ఎంతో ప్రయోజనం చేకూరుతుందన్నారు. ‘స్టాప్‌ టీబీ పార్టనర్‌షిప్‌’ 35వ బోర్డు సమావేశంలో వీడియో కాన్ఫరెన్స్‌ ద్వారా ప్రసంగించిన ఆయన ఈ ప్రకటన చేశారు. ఈ పరీక్షను ‘సీ-టీబీ’గా పిలుస్తారని చెప్పారు. క్షయ వ్యాధిని అంతమొందించేందుకు ప్రతిఒక్కరూ సహకరించాలని ఈ సందర్భంగా మంత్రి పిలుపునిచ్చారు.