అధ్యక్ష ఎన్నికలు మాకు పరీక్ష: జుకెర్‌ బర్గ్‌

ఇంటర్నెట్‌ డెస్క్‌: భారత్‌లో ఎన్నికల సందర్భంగా ప్రజాస్వామ్య సమగ్రతను కాపాడేందుకు తాము చేపట్టిన చర్యల అనుభవం.. అమెరికా అధ్యక్ష ఎన్నికల సమయంలో ఉపయోగపడుతోందని ఫేస్‌బుక్‌ సీఈవో మార్క్‌ జుకెర్‌ బర్గ్‌ అన్నారు. భారత్‌ సహా అనేక దేశాల ఎన్నికల సమయంలో ఇది మేలు చేసిందని ఆయన వివరించారు. నవంబరు 3న జరిగే అమెరికా అధ్యక్ష ఎన్నికలు తమకు పరీక్ష వంటివని జుకెర్ బర్గ్‌ పేర్కొన్నారు. ప్రజాస్వామ్య సమగ్రతను కాపాడేందుకు తాము నిరంతరం పోరాటం సాగిస్తూనే ఉంటామని స్పష్టం చేశారు. తాము చేసిన అనేక మార్పులు కూడా సమగ్రత రక్షణకు దోహదం చేశాయని వెల్లడించారు. ఓటర్ల అణచివేతను కట్టడి చేయటం సహా వివిధ అంశాలపై పౌరహక్కుల సంఘాలు, నిపుణులు, తదితరులతో కలిసి పనిచేస్తున్నామన్నారు. హ్యాకింగ్‌ లాంటి సంప్రదాయ ముప్పును తప్పించుకునేందుకు గత నాలుగేళ్లుగా నిపుణుల బృందాలతో కలిసి కృషి చేస్తున్నట్లు తెలిపారు. అయినా నకిలీ ఖాతాల ద్వారా తప్పుడు ప్రచారాలు, అవాస్తవాల వ్యాప్తి జరిగిందని వివరించారు. దీనిని అరికట్టేందుకు అత్యాధునిక సాంకేతిక పరిజ్ఞానం ఉపయోగిస్తున్నామని ఆయన పేర్కొన్నారు.