1962లో బలమైన నాయకత్వం ఉండి ఉంటే.. అరుణాచల్‌ గవర్నర్‌ కీలక వ్యాఖ్యలు

ఇటానగర్‌: సరిహద్దుల్లో సైనికులు ఎలాంటి పరిస్థితులకైనా సిద్ధంగా ఉండాలని సూచించిన అరుణాచల్‌ ప్రదేశ్‌ గవర్నర్‌ బ్రిగేడియర్‌ బీడీ మిశ్రా(రిటైర్డ్‌) కీలక వ్యాఖ్యలు చేశారు. 1962లో భారత్‌లో బలమైన నాయకత్వం ఉండి ఉంటే..  చైనాతో జరిగిన యుద్ధంలో భారత్‌ దెబ్బతిని ఉండేది కాదని వ్యాఖ్యానించారు. 1962లో భారత్‌-చైనా మధ్య యుద్ధం జరిగిన విషయం తెలిసిందే. చంగ్‌లాంగ్‌ జిల్లాలోని 14వ బెటాలియన్‌ ఆపరేషనల్‌ బేస్‌లో జరిగిన సైనిక సమ్మేళన్‌లో ఆయన శనివారం సాయంత్రం ప్రసంగిస్తూ ఈ వ్యాఖ్యలు చేశారు. 

‘‘1962లో భారత్‌కు బలమైన నాయకత్వం ఉండి ఉంటే.. చైనాతో మనకు ఎదురుదెబ్బ తగిలి ఉండేది కాదు. కానీ, ఇప్పుడు క్షేత్రస్థాయిలో సమీకరణాలు మారిపోయాయి. ప్రపంచంలో అత్యంత బలమైన సైనిక శక్తి కలిగిన దేశాల్లో భారత్‌ ఒకటి. మనం మన స్థైర్యాన్ని కోల్పోవద్దు. సరిహద్దుల్లో ఎలాంటి అవాంఛనీయ ఘటనల్ని ఎదుర్కోవడానికైనా సిద్ధంగా ఉండాలి. సైనికులు పట్టుదలతో ఉంటే.. వారికి అన్నింట్లో విజయం వరిస్తుంది. ప్రభుత్వ ఆలోచనాతీరులో సైతం చాలా మార్పొచ్చింది. సైనికుల సంక్షేమం కోసం దిల్లీలోని ప్రభుత్వం నిరంతరం కృషి చేస్తోంది’’ అని బ్రిగేడియర్‌ మిశ్రా అన్నారు.