Boko Haram: బోకోహరం ఉగ్రసంస్థ అధినేత హతం!

అబూజ: పశ్చిమాఫ్రికాలోని నైజీరియాలో వేల మందిని పొట్టన పెట్టుకొని, ఎంతో మందిని అపహరించిన ఉగ్రసంస్థ బోకోహరం ఉగ్రసంస్థ అధినేత అబూబకర్‌ షెకావ్‌ హతమైనట్లు తెలుస్తోంది. ఈ మేరకు ప్రత్యర్థి ఇస్లాం మిలిటెంట్‌ గ్రూప్‌ ఓ ఆడియో విడుదల చేసింది. అయితే నైజీరియా ప్రభుత్వం కానీ, బోకోహరం ఉగ్రవాద సంస్థ కానీ ఎలాంటి ప్రకటన చేయలేదు. రెండు గ్రూపుల మధ్య జరిగిన ఘర్షణలో అబూ బకర్‌ తనను తాను పేల్చుకొని మృతిచెందాడని ఇస్లామిక్‌ స్టేట్‌ వెస్ట్‌ ఆఫ్రికా ప్రావిన్స్‌ (ఐఎస్‌డబ్ల్యూఏపీ) ఓ ఆడియో విడుదల చేసింది.

రెండు వారాల క్రితమే షెకావు మరణించినట్లు రాయిలర్స్‌ వార్తా సంస్థ వెల్లడించింది. తమ అధినేత మరణంపై బోకోహరం ఇప్పటివరకు స్పందించలేదు. వాస్తవాలు తెలుసుకునేందుకు సైన్యం ప్రయత్నిస్తోందని.. ఆధారాలు లభించేంతవరకు ఎలాంటి ప్రకటన చేయలేమని నైజీరియా సైన్యం ప్రకటించింది. గతంలో అబూబకర్‌ షెకావ్‌ మృతిచెందినట్లు అనేకసార్లు వార్తలు వెలువడినా అవి నిజం కాదని తెలిపింది.