ఆ 279 మంది విద్యార్థినులు.. క్షేమమే!

లాగోస్‌: నైజీరియాలో ఇటీవల అపహరణకు గురైన 279 మంది విద్యార్థినులు దుండగుల చెర నుంచి విడుదలయ్యారు. బయటపడిన బాలికలంతా క్షేమంగా ఉన్నట్లు జాంఫరా రాష్ట్ర గవర్నర్‌ బెల్లో మతవాలె వెల్లడించారు. విద్యార్థినుల విడుదలకు ప్రభుత్వం దుండగులకు ఎలాంటి మూల్యం చెల్లించుకోలేదని గవర్నర్‌ వివరించారు. 

‘కిడ్నాప్‌కు గురైన ప్రభుత్వ పాఠశాల విద్యార్థినులు విడుదలయ్యారు. వారు ప్రస్తుతం అధికారుల వద్ద క్షేమంగానే ఉన్నారు. వారిని విడుదలకు శాంతియుత మార్గంలో మేం చేసిన ప్రయత్నం ఫలించింది. దుండగులకు ఎలాంటి మూల్యం చెల్లించలేదు. మేం వారికి ఏం తిరిగి ఇవ్వకుండానే అపహరణకు గురైన వారిని వెనక్కి తీసుకురాగలిగాం. వైద్య పరీక్షల నిమిత్తం బాలికల్ని ఆరోగ్య కేంద్రానికి పంపించాం’ అని గవర్నర్‌ వెల్లడించారు. 2014 ఏప్రిల్‌లోనూ బోర్నోరాష్ట్రంలో బిబోక్‌ పాఠశాల నుంచి బోకోహరామ్‌ తీవ్రవాదులు 276 మంది బాలికలను అపహరించుకుపోగా వారిలో వంద మంది ఏమయ్యారో ఇంతవరకూ తెలియరాలేదు.

నైజీరియాలోని జాంఫరా రాష్ట్రంలోని ఓ ప్రభుత్వ పాఠశాలపై కొందరు సాయుధులు దాడి చేసి 300 మంది విద్యార్థినులను అపహరించుకుపోయిన విషయం తెలిసిందే. డబ్బుకోసం, జైల్లో ఉన్న తమ వారి విడుదల కోసం ఉగ్రవాదులు ఈ దారుణాలకు పాల్పడుతున్నట్లు అక్కడి ప్రభుత్వం తెలిపింది.