India Corona : 260 రోజుల కనిష్ఠానికి క్రియాశీల కేసులు

దిల్లీ : దేశంలో కరోనా వ్యాప్తి అదుపులోనే ఉంది. రెండో రోజూ కేసులు 11 వేలకు దిగువనే నమోదయ్యాయి. మరోవైపు రాష్ట్రాలు మరణాల సంఖ్యను సవరిస్తుండటంతో ఆ సంఖ్య ఎక్కువగానే ఉంటోంది. నిన్న 500కుపైగా మరణాలు నమోదయ్యాయి. ఆదివారం కేంద్ర ఆరోగ్య శాఖ వెల్లడించిన గణాంకాల ప్రకారం..

* నిన్న 9,19,996 కరోనా నిర్ధారణ పరీక్షలు నిర్వహించగా.. 10,853 కొత్త కేసులు వెలుగులోకి వచ్చాయి.

* గడిచిన 24 గంటల్లో కరోనాతో 526 మంది ప్రాణాలు కోల్పోయారు. దీంతో ఇప్పటి వరకూ మరణించిన వారి సంఖ్య 4,60,791కి చేరింది.

* కొత్త కేసుల కంటే రికవరీలే ఎక్కువగా ఉండటం సానుకూలాంశం. నిన్న 12,432 మంది కరోనాను జయించగా.. ఇప్పటి వరకూ కోలుకున్న వారి సంఖ్య 3.37 కోట్లు(98.24 శాతం) దాటింది.

* ప్రస్తుతం క్రియాశీల కేసుల సంఖ్య 144845(0.42%)కి తగ్గి.. 260 రోజుల కనిష్ఠానికి  చేరింది.

* ఇక దేశవ్యాప్తంగా వ్యాక్సినేషన్‌ కాస్త నెమ్మదిగా సాగుతోంది. నిన్న 28,40,174 మందికి టీకాలు అందించారు. దీంతో ఇప్పటి వరకూ అందించిన టీకా డోసుల సంఖ్య 108 కోట్లు దాటింది.