US: కమలా హారిస్‌కు అమెరికా తాత్కాలిక అధ్యక్ష బాధ్యతలు

బేతెస్థ (అమెరికా): అగ్రరాజ్య అధ్యక్షుడు జో బైడెన్‌ తన అధికారాలను శుక్రవారం కొన్ని గంటల పాటు ఉపాధ్యక్షురాలు కమలా హారిస్‌కు బదిలీ చేశారు. సాధారణ వైద్యపరీక్షల్లో భాగంగా ఆయనకు కోలనోస్కోపీ (పెద్దపేగు, పురీషనాళంలో మార్పుల్ని గుర్తించే పరీక్ష) చేస్తుండటంతో ఇలా చేస్తున్నట్టు శ్వేతసౌధం తెలిపింది. బేతెస్థలోని వాల్టర్‌ రీడ్‌ నేషనల్‌ మిలటరీ మెడికల్‌ సెంటర్‌లో ఆయనకు మత్తుమందు ఇచ్చి ఈ పరీక్ష చేస్తారు. మత్తులో ఉన్నంతసేపు ఆయన అధికారిక బాధ్యతలను ఉపాధ్యక్షురాలికి అప్పగించారు. అధ్యక్షుడిగా ఎన్నికయ్యాక బైడెన్‌ కోలనోస్కోపీ చేయించుకోవడం ఇదే తొలిసారని శ్వేతసౌధం మీడియా కార్యదర్శి జెన్‌ సాకి చెప్పారు. 79 ఏళ్ల బైడెన్‌ అమెరికా చరిత్రలోనే అతిపెద్ద వయసున్న అధ్యక్షుడు.