Lancet Study: కరోనా రెండోదశ వేళ.. కొవిషీల్డ్ ప్రభావంతంగా పనిచేసింది

దిల్లీ: కరోనా రెండో దశలో డెల్టా వేరియంట్ విజృంభణ ఏ స్థాయిలో విలయం సృష్టించిందో తెలిసిందే. ఆ సమయంలో కరోనా టీకా కొవిషీల్డ్ ప్రభావంతంగా పనిచేసింది. ఈ మేరకు ది లాన్సెట్ ఇన్ఫెక్షియస్ డిసీజెస్ జర్నల్‌లో ఓ అధ్యయనం ప్రచురితమైంది. ఏప్రిల్-మేలో కొవిడ్ ఉద్ధృతి తీవ్రంగా ఉన్న సమయంలో ఆరోగ్య వ్యవస్థలు ఒత్తిడిలో ఉన్నప్పుడు అధ్యయనకర్తలు టీకా పనితీరును విశ్లేషించారు. రెండు డోసులు తీసుకున్న వ్యక్తుల్లో ఈ టీకా 63శాతం ప్రభావశీలత చూపిందని పేర్కొన్నారు. అలాగే మోస్తరు నుంచి తీవ్రస్థాయి కొవిడ్‌ విషయంలో 81 శాతం ప్రభావం చూపినట్లు వెల్లడించారు. 

కరోనా కొత్త వేరియంట్ ఒమిక్రాన్ వెలుగులోకి వచ్చిన వేళ.. ఈ అధ్యయనం లాన్సెట్‌లో ప్రచురితమైంది. గత వారం దక్షిణాఫ్రికాలో ఈ కొత్త వేరియంట్‌ను గుర్తించగా.. ఆరోగ్య సంస్థ దానిని ఆందోళన కలిగించే రకంగా వర్గీకరించింది. దాని వ్యాప్తి ఏ స్థాయిలో ఉంటుందో స్పష్టత లేనప్పటికీ.. ప్రపంచ ఆరోగ్య సంస్థ మాత్రం ఈ వేరియంట్‌ మరో ముప్పుగా మారే అవకాశం ఉందని హెచ్చరించింది. 

ఇదిలా ఉండగా.. కరోనా రెండోదశ కారణంగా ఆగిపోయిన టీకా డోసుల ఎగుమతిని సీరమ్ ఇనిస్టిట్యూట్ పునః ప్రారంభించింది. కొవాక్స్ కార్యక్రమం కింద అల్ప, మధ్యాదాయ దేశాలకు వీటిని అందిస్తోంది. పుణెకు చెందిన ఈ సీరమ్ సంస్థ ఇప్పటివరకు 1.25 బిలియన్లకు పైగా టీకా డోసుల్ని ఉత్పత్తి చేసింది.