Omicron Variant: ఒమిక్రాన్.. డెల్టాను మించి వ్యాపిస్తుందా?

వైద్య నిపుణులు ఏమంటున్నారంటే..?

జోహెన్నస్‌బర్గ్: ప్రపంచవ్యాప్తంగా మరీ ముఖ్యంగా భారత్‌లో డెల్టా వేరియంట్ సృష్టించిన విలయాన్ని ఇంకా ఎవ్వరూ మర్చిపోలేదు. ఈ లోపే ఒమిక్రాన్ రూపంలో కొత్త వేరియంట్ పుట్టుకొచ్చింది. అయితే ఈ కొత్త వేరియంట్ డెల్టాను మించి వ్యాప్తి చెందే అవకాశం ఉందన్న వార్తలు ఇప్పుడు కలవరపెడుతున్నాయి. ఆ ఆస్కారం లేకపోలేదని దక్షిణాఫ్రికాకు చెందిన కమ్యూనికబుల్ డిసీజెస్ ఇనిస్టిట్యూట్ డైరెక్టర్ అడ్రియన్ పూరెన్ అభిప్రాయం వ్యక్తం చేశారు. 

‘ అంచనాలకు తగ్గట్టే డెల్టాను మించి ఒమిక్రాన్ వ్యాపిస్తే.. కేసులు భారీగా పెరిగే అవకాశం ఉంది. దాంతో వైద్యసేవలపై తీవ్ర ఒత్తిడి పడుతుంది. టీకాలు, ఇన్ఫెక్షన్ల కారణంగా వచ్చిన రోగనిరోధక శక్తిని ఈ కొత్త వేరియంట్ ఏమేరకు ఏమార్చగలదో నాలుగు వారాల్లోగా శాస్త్రవేత్తలు తెలుసుకోవాలని ఈ సందర్భంగా ఆయన అన్నారు. అలాగే ఇతర వేరియంట్ల కంటే తీవ్రమైన లక్షణాలు కనిపిస్తున్నాయో లేదో గుర్తించాలన్నారు. 

దక్షిణాఫ్రికాలో వెలుగుచూసిన ఈ వేరియంట్‌ బాధితుల్లో స్వల్పస్థాయి లక్షణాలు కనిపించినట్లు అక్కడి వైద్యులు వెల్లడించిన సంగతి తెలిసిందే. అయితే ఆ విషయంపై ఇప్పుడే ఒక అంచనాకు రావొద్దని వైద్య నిపుణులు సూచించారు. అలాగే ఆ దేశంలోని గాటెంగ్ ప్రావిన్స్‌లో వేగంగా కేసులు పెరుగున్న నేపథ్యంలో.. డెల్టాను ఈ వేరియంట్‌ భర్తీ చేసిందనే వాదనపై ఒక అభిప్రాయానికి రావడం కూడా తొందరపాటే అవుతుందని పూరెన్ అన్నారు .

ఇదిలా ఉండగా.. డెల్టా వేరియంట్ కారణంగా దక్షిణాఫ్రికా ఇప్పటికే కరోనా మూడో వేవ్‌ను ఎదుర్కొంది. ఆ సమయంలో గరిష్ఠంగా ఒక్కరోజే 26 వేలకు పైగా కొత్త కేసులు వెలుగుచూశాయి. ఇప్పుడు ఒమిక్రాన్ నాలుగో వేవ్‌కు కారణమవుతుందనే అంచనాలు వెల్లడవుతున్నాయి. వేగంగా పెరుగుతున్న కేసులే ఆ ఆందోళనకు కారణం. మరోపక్క, దేశవ్యాప్తంగా కొత్త కేసులు పెరుగుతున్నాయని, ఒమిక్రాన్ కంటే ముందే ఈ కేసుల్లో పెరుగుదల  కనిపిస్తోందని మరో వైద్య నిపుణుడు పేర్కొన్నారు. ఆ దేశంలో ఇప్పటివరకు సుమారు 30 లక్షల కొత్త కేసులు, 89 వేలకు పైగా మరణాలు సంభవించాయి.