Vaccine For Children: చిన్నారులకు టీకా.. అమెరికా కీలక నిర్ణయం

వాషింగ్టన్: కరోనా మహమ్మారికి అడ్డుకట్ట వేసే క్రమంలో యూఎస్‌ ప్రభుత్వం కీలక నిర్ణయం తీసుకుంది. 5 నుంచి 11 సంవత్సరాల చిన్నారులకు టీకాలు అందించేందుకు ఫైజర్ టీకాకు ఆమోదం తెలిపింది. అక్కడి అత్యున్నత స్థాయి నిపుణుల బృందం ఇచ్చిన అనుమతి మేరకు ఈ ప్రకటన వెలువడింది. టీకా పొందడం వల్ల దుష్ప్రభావాల కంటే ప్రయోజనాలే ఎక్కువగా ఉన్నాయని ఆ బృందం స్పష్టం చేసింది. ఫలితంగా 28 మిలియన్ల మంది అమెరికన్ చిన్నారులకు టీకా లభించనుంది.

‘తల్లిదండ్రులు, సంరక్షకులు, పాఠశాల సిబ్బంది, చిన్నారులు ఈ అనుమతి కోసం ఎదురుచూస్తున్నారు. ఒక తల్లిగా, వైద్యురాలిగా నాకు ఈ విషయం తెలుసు. చిన్నారులకు టీకా అందడం వల్ల మనం సాధారణ పరిస్థితులకు దగ్గరగా వెళ్లే అవకాశం ఉంది’ అని ఫుడ్‌ అండ్‌ డ్రగ్స్ అడ్మినిస్ట్రేషన్‌(ఎఫ్‌డీఏ) కమిషనర్ జానెట్ వుడ్‌కాక్ వెల్లడించారు. కాగా, కొద్ది రోజుల్లో ఈ టీకా కార్యక్రమం ప్రారంభం కానుంది. ఇప్పటికే చైనా, చిలీ, క్యూబా, యునైటెడ్ అరబ్ ఎమిరేట్స్ చిన్నారులకు టీకా అందిస్తున్నాయి.