Ammu: అక్టోబర్‌ 19న అమెజాన్‌ ప్రైమ్‌లో విడుదల కానున్న ‘అమ్ము’..!

హైదరాబాద్‌: తాజాగా పొన్నియిన్‌ సెల్వన్‌ సినిమాలో  అలరించింది ఐశ్వర్య లక్ష్మి. ఈ నటి ప్రధాన పాత్రలో నటించిన సినిమా ‘అమ్ము’. ఎమోషనల్‌ థ్రిల్లర్‌గా రానున్న ఈ చిత్రం ఈ నెల19న (october 19) అమెజాన్‌ ప్రైమ్‌లో విడుదల కానుంది. ఈ సందర్భంగా చిత్రబృందం సినిమా టీజర్‌ను రిలీజ్‌ చేసింది. ‘నా పేరు అమ్ము, నేను అందరి అమ్మాయిల్లాగే ఎప్పుడెప్పుడు నా రాకుమారుడి చేయి పట్టుకుని రంగుల ప్రపంచంలో విహరిద్దామా అని కలలు కనేదాన్ని..కానీ..’ అనే డైలాగ్‌తో ఉన్న ఈ టీజర్‌ ఆసక్తికరంగా ఉంది. ఫ్యామిలీ కథాంశంతో రానున్న ఈ సినిమాకు కార్తీక్‌ సుబ్బరాజు క్రియేటివ్‌ ప్రొడ్యూసర్‌. చారుకేశ్‌ శేఖర్‌ రచన, దర్శకత్వం వహిస్తున్నారు. ఐశ్వర్య లక్ష్మి, నవీన్ చంద్ర, సింహా ముఖ్య పాత్రల్లో నటిస్తున్నారు. ఈ చిత్రం తెలుగు, తమిళం, మలయాళం, హిందీ, కన్నడ భాషల్లో డిజిటల్‌ ప్రేక్షకులను అలరించనుంది.