NTR: ఎన్టీఆర్‌ కోసం బుచ్చిబాబు ఇంకొన్ని రోజులు వేచి చూడాల్సిందేనా?

ఇంటర్నెట్‌డెస్క్‌: ‘ఆర్‌ఆర్‌ఆర్‌’(RRR) తర్వాత ఎన్టీఆర్‌ చేయబోయే సినిమాలపై స్పష్టత వచ్చేసింది. తారక్‌ పుట్టినరోజు సందర్భంగా కొరటాల శివ, ప్రశాంత్‌ నీల్‌ దర్శకత్వంలో సినిమాలు చేస్తున్నట్లు ప్రకటనలు వచ్చాయి. అయితే, బుచ్చిబాబు దర్శకత్వంలోనూ ఓ సినిమా ఉంటుందని గతంలో టాక్‌ వినిపించింది. పుట్టినరోజు సందర్భంగా ఈ ప్రకటన ఉంటుందని అందరూ ఆశించారు. కానీ, అలాంటిదేమీ లేదు. తొలి చిత్రం ‘ఉప్పెన’తోనే విజయాన్ని తన ఖాతాలో వేసుకున్న బుచ్చిబాబు ఎన్టీఆర్‌కు కథ చెప్పారని టాక్‌. స్పోర్ట్స్‌ డ్రామాగా సినిమా ఉంటుందని కూడా చెప్పుకొన్నారు. తాజాగా ప్రకటనలు చూస్తే ఈ సినిమా ఇప్పట్లో లేనట్లే. కొరటాల శివ దర్శకత్వంలో తెరకెక్కే ఎన్టీఆర్‌ 30వ సినిమా జులై నుంచి సెట్స్‌పైకి వెళ్లనుంది. ఇప్పటికే స్క్రిప్ట్‌ పనులు పూర్తయ్యాయి. ఈ ఏడాది చివరి నాటికి షూటింగ్‌ పూర్తయ్యే అవకాశం ఉంది. ఆ తర్వాత ప్రశాంత్‌ నీల్‌ సినిమాలో ఎన్టీఆర్‌ నటించనున్నారు.