లాక్‌డౌన్‌ తర్వాత హీరోహీరోయిన్‌ కౌగిలింత ఇలా!

షూటింగ్ ఆరంభించిన తొలి చిత్రమిది

హైదరాబాద్‌: సినిమాల్లోనే కాదు.. పనిలోనూ, ప్రవర్తనలోనూ వైవిధ్యాన్ని ప్రదర్శించే దర్శకుడు రవిబాబు. ఆయన తెరకెక్కిస్తున్న కొత్త సినిమా ‘క్రష్‌’. లాక్‌డౌన్‌ తర్వాత సినిమా షూటింగ్‌లకు అనుమతి రావడంతో చిత్రీకరణ ఆరంభించారు. ప్రభుత్వ అనుమతులు లభించిన తర్వాత ప్రారంభమైన తొలి సినిమా షూట్‌ ఇదేనని ఈ సందర్భంగా రవిబాబు అన్నారు. ఈ మేరకు సెట్‌లో వీడియో విడుదల చేశారు. హీరో హీరోయిన్‌ కౌగిలించుకునే సన్నివేశాన్ని తెరకెక్కించామని చెప్పారు. ‘హీరో ఈ పక్క నుంచి పరిగెత్తుకుని వస్తాడు.. హీరోయిన్‌ ఆ పక్క నుంచి పరిగెత్తుకుని వస్తుంది. ఇద్దరు గట్టిగా హగ్‌ చేసుకుంటారు’ అంటూ రవిబాబు మధ్యలో గాజు గోడను పెట్టారు. రొమాంటిక్ సన్నివేశంలోనూ భౌతికదూరాన్ని పాటిస్తున్నామని ఆ సన్నివేశం ద్వారా ఆయన స్పష్టం చేశారు.

రవిబాబు గత ఏడాది ‘అదుగో’, ‘ఆవిరి’ సినిమాలతో ప్రేక్షకుల ముందుకు వచ్చారు. రెండు సినిమాల్లోనూ ఆయన ప్రధాన పాత్ర పోషించారు. దర్శకత్వం కూడా వహించారు.