కథల ఎంపికలో...

ప్రభాస్‌ కొత్త సినిమాల జాబితా చాలా పెద్దదే. విరామం లేకుండా చేసినా ఇప్పటికే ఒప్పుకున్న సినిమాలు పూర్తయ్యేసరికి ఏళ్ల సమయం పడుతుంది. అయినా సరే.. ఆయన కోసం కొత్త కథలు సిద్ధమవుతూనే ఉన్నాయి. అటు బాలీవుడ్‌ నుంచి ఇటు దక్షిణాది వరకు ప్రభాస్‌ని దృష్టిలో ఉంచుకుని దర్శకులు స్క్రిప్ట్‌లు సిద్ధం చేస్తున్నారు. కరోనా పరిస్థితులతో వచ్చిన ఈ విరామంలోనూ ఆయన కొత్త కథలు వినడంపైనే దృష్టి పెట్టినట్టు తెలుస్తోంది. యువ దర్శకులు తయారు చేసిన కథలు వినడానికే ఆయన ఉత్సాహం చూపిస్తున్నట్టు తెలిసింది.

ప్రభాస్‌తో సినిమా చేయబోతున్నారంటూ ఇటీవల పలువురు తెలుగు దర్శకుల పేర్లు ప్రచారంలోకి వచ్చాయి. అయితే ప్రభాస్‌ మాత్రం ఇంకా కథల్ని ఎంపిక చేయడంపైనే దృష్టిపెట్టినట్టు తెలిసింది. త్వరలోనే ‘రాధేశ్యామ్‌’తో అలరించనున్న ప్రభాస్‌, ఆ తర్వాత ‘సలార్‌’ని పూర్తి చేయడం కోసం రంగంలోకి దిగుతారు.