Bhala Thandhanana Teaser: నిజాయితీగా ఉంటే సాధారణ మనిషికి కూడా రిస్కే

హైదరాబాద్‌: ‘‘నిజాయితీగా ఉండాలనుకుంటే ఈ దేశంలో కామన్‌మెన్‌కి కూడా రిస్కే’’ అని అంటున్నారు నటి కేథరిన్‌. ఆమె, నటుడు శ్రీవిష్ణు జంటగా నటించిన చిత్రం ‘భళా తందనాన’. చైతన్య దంతులూరి దర్శకత్వం వహించిన ఈ సినిమా ప్రస్తుతం పోస్ట్‌ ప్రొడెక్షన్‌ పనులు జరుపుకొంటోంది. అవినీతి నేపథ్యంలో సాగే కథతో సస్పెన్స్‌ థ్రిల్లర్‌గా సిద్ధమైన ఈ చిత్రాన్ని ఫిబ్రవరి నెలలో ప్రేక్షకుల ముందుకు తీసుకువచ్చేందుకు చిత్రబృందం సన్నాహాలు చేస్తోంది. ఈ నేపథ్యంలో శుక్రవారం ఉదయం సినిమా టీజర్‌ను నాని విడుదల చేశారు.

‘‘రాక్షసుడిని చంపడానికి దేవుడు కూడా అవతారాలెత్తాలి. నేను మాములు మనిషిని’’ అంటూ శ్రీవిష్ణు చెప్పే పవర్‌ఫుల్‌ డైలాగ్‌తో ఈ టీజర్‌ ప్రారంభమైంది. ఇందులో శ్రీవిష్ణు విలేకరిగా కనిపించనున్నారు. ‘‘సీఎం కుర్చీలో కూర్చొన్న ఎవరైనా ఒక్క సంతకంతో స్టేట్‌ ఫ్యూచర్‌నే మార్చేయవచ్చు. అంటే ఆ పవర్‌ చేతిదా? లేక కుర్చీదా?’’ అంటూ టీజర్‌ చివర్లో శ్రీవిష్ణు చెప్పే సంభాషణలు ఆలోచింపజేసేలా ఉన్నాయి.