Vikram: పద.. చూసుకుందాం!

కమల్‌హాసన్‌ కథానాయకుడిగా లోకేష్‌ కనగరాజ్‌ తెరకెక్కించిన యాక్షన్‌ చిత్రం ‘విక్రమ్‌’. విజయ్‌ సేతుపతి, ఫహాద్‌ ఫాజిల్‌ ప్రధాన పాత్రలు  పోషించారు. సూర్య అతిథి పాత్రలో నటించారు. ఈ సినిమాని తెలుగులో శ్రేష్ఠ్‌ మూవీస్‌ పతాకంపై విడుదల చేస్తున్నారు. శుక్రవారం ఈ చిత్ర తెలుగు ట్రైలర్‌ను హీరో రామ్‌చరణ్‌ విడుదల చేశారు. ‘‘అడవి అన్నాక సింహం, పులి, చిరుత.. అన్నీ  వేటకెళ్తాయి. జింక తప్పించుకోవాలని చూస్తుంది. ఆలోపు సూర్యాస్తమయమైతే.. సూర్యోదయాన్ని చూడబోయేది ఎవరు అనేది ప్రకృతి నిర్ణయిస్తుంది. కానీ, ఈ అడవిలో వెలుగు ఎప్పుడు, ఎక్కడా అని నిర్ణయించేది ప్రకృతి కాదు. నేను’’ అనే వాయిస్‌ ఓవర్‌తో విక్రమ్‌లోని పాత్రల్ని పరిచయం చేసిన తీరు ఆసక్తిరేకెత్తించేలా ఉంది. కమల్‌, విజయ్‌, ఫహాద్‌ల పాత్రలు మూడు వేటికవే శక్తి మంతంగా కనిపించాయి. ట్రైలర్‌ ఆద్యంతం యాక్షన్‌ హంగామానే కనిపించింది. ‘‘సర్‌.. మనల్ని  బయటకు రానీయకుండా సంతానం మనుషులు చుట్టుముట్టేస్తే ఏం చేయాలి?’’ అని ఓ వ్యక్తి అడగ్గా.. ‘‘ఇలాంటి సమయంలో వీరులంతా తరచుగా చెప్పే మాటేంటో తెలుసా? పద చూసుకుందాం’’ అని కమల్‌ బదులివ్వడం ట్రైలర్‌కు హైలైట్‌గా నిలిచింది. ఈ సినిమాకి అనిరుధ్‌ స్వరాలందించారు. గిరీష్‌ గంగాధర్‌ ఛాయాగ్రాహకుడిగా వ్యవహరించారు.