తల్లి కాబోతున్న గాయని శ్రేయాఘోషల్‌

ముంబయి: తన మధురమైన స్వరంతో ప్రపంచవ్యాప్తంగా అభిమానులను సొంతం చేసుకున్న గాయని శ్రేయాఘోషల్‌ తాజాగా ఓ శుభవార్త చెప్పారు. ఆమె త్వరలో తల్లికాబోతున్నానని తెలియజేస్తూ ఓ చిత్రాన్ని అభిమానులతో పంచుకున్నారు. ‘బేబీ శ్రేయాదిత్య(శ్రేయాఘోషల్‌+షీలాదిత్య) రాబోతుంది. షీలాదిత్య, నేనూ ఈ శుభవార్తను మీతో పంచుకోవడం సంతోషకరంగా భావిస్తున్నాం. జీవితంలో కొత్త ప్రయాణానికి సిద్ధమవుతోన్న ఈ తరుణంలో మీ దీవెనలు మాకెంతో అవసరం’ అని శ్రేయాఘోషల్‌ తెలిపారు.

‘సరిగమ’ విజేతగా కెరీర్‌ను ఆరంభించిన శ్రేయాఘోషల్‌ బాలీవుడ్‌లో తెరకెక్కిన ఎన్నో చిత్రాల్లో తన పాటలతో ప్రేక్షకుల్ని అలరించారు. ‘దేవదాస్‌’, ‘గజని’, ‘3 ఇడియట్స్‌’, ‘దిల్లీ 6’, ‘దబాంగ్‌’, ‘స్టూడెంట్‌ ఆఫ్‌ ది ఇయర్‌’, ‘ఆషికీ-2’, ‘క్రిష్‌’, ‘భాఘి-2’, ‘పద్మావత్‌’ చిత్రాల్లో ఆమె పాడిన పాటలు ఎంతగానో ఆకట్టుకున్నాయి. కేవలం బాలీవుడ్‌లోనే కాకుండా దక్షిణాది భాషల్లో సైతం శ్రేయా తన స్వరాన్ని వినిపించారు. తెలుగులో ఎన్నో మధురమైన పాటలు అలపించిన శ్రేయా ఇటీవల.. ‘ఉప్పెన’, ‘టక్‌ జగదీశ్‌’తో మరోసారి అభిమానులను మెప్పించారు.