Prithviraj: అందరూ సిద్ధం కండి.. హిందూస్థాన్‌ షేర్‌ వస్తోంది

ముంబయి: బాలీవుడ్‌ నటుడు అక్షయ్‌కుమార్‌ జోరు కొనసాగుతోంది. ఇటీవలే ‘సూర్యవంశీ’తో హిట్‌ అందుకున్న అక్షయ్‌.. ఇప్పుడు మరో చిత్రంతో ప్రేక్షకులను అలరించడానికి సిద్ధమయ్యారు. ఆయన కథానాయకుడిగా నటిస్తున్న పీరియాడికల్‌ డ్రామా ‘పృథ్వీరాజ్‌’. చౌహాన్‌ రాజవంశానికి చెందిన రాజు పృథ్వీరాజ్‌ చౌహాన్‌ జీవితాన్ని ఆధారంగా చేసుకుని ఈ చిత్రాన్ని రూపొందిస్తున్నారు. తాజాగా ఈ సినిమా టీజర్‌ను చిత్రబృందం విడుదల చేసింది.

‘‘సలామ్‌ చేయడానికి అందరూ సిద్ధం కండి. హిందూస్థాన్‌ సింహం వచ్చేస్తోంది’’ అంటూ పవర్‌ఫుల్‌ డైలాగ్‌లతో ఉన్న ఈ టీజర్‌ ఆద్యంతం ఆకట్టుకునేలా ఉంది. యాక్షన్‌ సన్నివేశాలతో రూపుదిద్దుకున్న ఈ టీజర్‌ ద్వారా సినిమాలో కీలక పాత్రధారుల్ని పరిచయం చేసింది. ఇందులో అక్షయ్‌కు జోడీగా మాజీ ప్రపంచ సుందరి మానుషీ చిల్లార్‌ సందడి చేయనున్నారు. యశ్‌ రాజ్‌ ఫిల్మ్స్‌ పతాకంపై ఈ సినిమా నిర్మితమవుతోంది. వచ్చే ఏడాది జనవరి 21న ఈ సినిమా ప్రేక్షకుల ముందుకు రానుంది.