Nagarjuna Naga Chaitanya:  బంగార్రాజు మొదలుపెట్టేశాడు..!

హైదరాబాద్‌: అగ్రకథానాయకుడు అక్కినేని నాగార్జున తన తదుపరి ప్రాజెక్ట్‌ని పట్టాలెక్కించేశారు. నాగార్జున ఆయన తనయుడు నాగచైతన్య ప్రధాన పాత్రల్లో నటించనున్న ‘బంగార్రాజు’ శుక్రవారం వేడుకగా ప్రారంభమైంది. కల్యాణ్‌ కృష్ణ ఈ చిత్రానికి దర్శకత్వం వహించనున్నారు. కృతిశెట్టి కథానాయిక. శ్రావణ శుక్రవారాన్ని పురస్కరించుకుని అన్నపూర్ణ స్టూడియోస్‌లో ‘బంగార్రాజు’ మూవీ చిత్రీకరణ ప్రారంభమైంది. ఈ పూజా కార్యక్రమానికి నాగార్జున, నాగచైతన్య, కృతిశెట్టి, దర్శకుడితోపాటు ఇతర చిత్రబృందం హాజరయ్యారు. 2016లో విడుదలైన ‘సోగ్గాడే చిన్నినాయన’ చిత్రానికి ప్రీక్వెల్‌గా ‘బంగార్రాజు’ సిద్ధం కానుంది.

థియేటర్లలోనే సీటిమార్‌

గోపీచంద్‌ కథానాయకుడిగా తెరకెక్కిన స్పోర్ట్స్‌ డ్రామా ‘సీటిమార్‌’. సంపత్‌ నంది దర్శకత్వం వహించిన ఈ సినిమా విడుదల గురించి చిత్రబృందం క్లారిటీ ఇచ్చింది. థియేటర్లలోనే ఈ సినిమా విడుదల కానుందని శుక్రవారం అధికారికంగా ప్రకటించింది. ఈ మేరకు సెప్టెంబర్‌లో ‘సీటిమార్‌’ ప్రేక్షకుల ముందుకు రానున్నట్లు తెలిపింది. కబడ్డీ నేపథ్యంలో తెరకెక్కిన ఈ సినిమాలో గోపీచంద్‌ కోచ్‌గా కనిపించనున్నారు. తమన్నా కథానాయిక. భూమిక కీలకపాత్రలో కనిపించనున్నారు. శ్రీనివాసా సిల్వర్‌ స్క్రీన్‌ పతాకంపై శ్రీనివాసా ఈ చిత్రాన్ని నిర్మిస్తున్నారు.