Yash: అప్పుడు షారుఖ్‌తో.. ఇప్పుడు అమిర్‌తో..!

పోటీపడుతోన్న సౌత్‌ స్టార్‌ హీరో

హైదరాబాద్‌: ‘సూర్యవంశీ’ చిత్రానికి ప్రేక్షకుల నుంచి వచ్చిన రెస్పాన్స్‌తో బాలీవుడ్‌ దర్శకనిర్మాతలు సైతం థియేటర్లలో సినిమాలు విడుదల చేసేందుకు ముందుకు వస్తున్నారు. దీంతో బీటౌన్‌ స్టార్స్‌ చిత్రాల రిలీజ్‌లపై ఇప్పుడిప్పుడే ఓ క్లారిటీ వస్తోంది. ఈ క్రమంలోనే తాజాగా అమిర్‌ఖాన్‌ కథానాయకుడిగా తెరకెక్కిన ‘లాల్‌సింగ్‌ చద్దా’ని వచ్చే ఏడాది ఏప్రిల్‌ 14న విడుదల చేయనున్నట్లు చిత్రబృందం శనివారం అధికారికంగా ప్రకటించింది. అదే రోజున యశ్‌ నటించిన ‘కేజీఎఫ్‌-2’ కూడా విడుదల కానున్న విషయం తెలిసిందే. దీంతో ‘కేజీఎఫ్‌-2’, ‘లాల్‌సింగ్‌ చద్దా’ సినిమాలపై నెట్టింట్లో చర్చ జరుగుతోంది. మా హీరో సినిమా విజయం సాధిస్తుందంటే.. మా హీరో సినిమానే బాక్సాఫీస్‌ రికార్డులు సొంతం చేసుకుంటుందని అభిమానులు కామెంట్లు చేస్తున్నారు. ఇదిలా ఉండగా మరికొందరు నెటిజన్లు.. ‘‘కేజీఎఫ్‌-1’ సినిమా విడుదలైనప్పుడే షారుఖ్‌ నటించిన ‘జీరో’ రిలీజైంది. ఇప్పుడు మళ్లీ ‘కేజీఎఫ్‌-2’ టైమ్‌లో అమిర్‌ఖాన్‌ నటించిన ‘లాల్‌సింగ్‌ చద్దా’ వస్తోంది. యశ్‌ తన సినిమాలతో బాలీవుడ్‌ మార్కెట్‌లోనూ మంచి పోటీ ఇస్తున్నాడు’’ అని చెప్పుకొంటున్నారు.

భారీ యాక్షన్‌ ఎంటర్‌టైనర్‌గా తెరకెక్కిన ‘కేజీఎఫ్‌-2’ చిత్రానికి ప్రశాంత్‌నీల్‌ దర్శకత్వం వహించారు. ఇందులో యశ్‌ రాఖీ బాయ్‌ పాత్రలో కనిపించనున్నారు. బాలీవుడ్‌ నటుడు సంజయ్‌దత్‌, నటి రవీనా టాండన్‌, రావు రమేశ్‌ ఈ సినిమాలో కీలక పాత్రల్లో కనిపించనున్నారు. మరోవైపు 2018లో విడుదలైన ‘కేజీఎఫ్‌’ సీక్వెల్‌గా ‘కేజీఎఫ్‌-2’ తెరకెక్కిన విషయం తెలిసిందే.