‘పెట్రో’ ధరలపై కేజ్రీవాల్‌ మౌనం ఎందుకు? 

వ్యాట్‌ తగ్గించాలని కాంగ్రెస్‌ డిమాండ్‌

దిల్లీ: పెట్రోల్‌, డీజిల్‌ ధరలు పెరిగిపోతుంటే కేజ్రీవాల్‌ ఎందుకు మౌనంగా ఉన్నారని కాంగ్రెస్‌ ప్రశ్నించింది. నగరంలో ఇంధన ధరలపై వ్యాట్‌ తగ్గించాలని డిమాండ్‌ చేస్తూ దిల్లీ కాంగ్రెస్‌ చీఫ్‌ అనిల్‌ కుమార్‌ కేజ్రీవాల్‌కు లేఖ రాశారు. పెట్రోల్‌, డీజిల్‌ ధరలు పెరిగిపోవడంతో ప్రజలు ఎదుర్కొంటున్న కష్టాలను సీఎం దృష్టికి తీసుకెళ్లారు. దిల్లీ ప్రభుత్వం లీటరు పెట్రోల్‌పై రూ.23లు, లీటరు డీజిల్‌పై రూ.13లు వ్యాట్‌ విధించడం ప్రజలను మోసగించడమేనని విమర్శించారు. పెద్ద ఎత్తున వ్యాట్‌ విధిస్తున్నందుకు దిల్లీ ప్రజలు సీఎంను సమాధానం కోరుతున్నారని పేర్కొన్నారు. మోదీ ప్రభుత్వం విధిస్తున్న అధిక ఎక్సైజ్‌ సుంకంతో దిల్లీలో గతంలో ఎన్నడూ లేనంత ప్రియంగా మారాయన్నారు. ఇంధన ధరలు పైపైకి పోతుంటే దిల్లీ ముఖ్యమంత్రి ఎందుకు మౌనంగా ఉంటున్నారని ప్రశ్నించారు. ధరలు తగ్గించే అంశంపై ప్రధానితో ఎందుకు మాట్లాడటంలేదని ప్రశ్నించారు. పన్నులు తగ్గించాలని మోదీ ప్రభుత్వాన్ని ఎందుకు అడగడం లేదన్నారు. దిల్లీలో ప్రస్తుతం లీటరు పెట్రోల్‌ ధర రూ.100.91 పైసలు కాగా.. డీజిల్‌ ధర రూ.89.88గా ఉంది.