Punjab Polls: పంజాబ్‌ అసెంబ్లీ ఎన్నికలువాయిదా? నేడు ఈసీ నిర్ణయం!

దిల్లీ: పంజాబ్‌లో అసెంబ్లీ ఎన్నికల పోలింగ్‌ తేదీని మార్చాలని అధికార కాంగ్రెస్‌ సహా అన్ని ప్రధాన పార్టీలు ఎన్నికల సంఘానికి విజ్ఞప్తి చేశాయి. ఈసీ ఇటీవల ప్రకటించిన ఎన్నికల షెడ్యూల్‌ ప్రకారం.. పంజాబ్‌లో ఫిబ్రవరి 14న ఒకే విడతలో పోలింగ్‌ జరగాల్సి ఉంది. కానీ, ఫిబ్రవరి 16న గురు రవిదాస్‌ జయంతి ఉంది. దానికి సంబంధించిన ఉత్సవాలు ముందే ప్రారంభమవుతాయి. పైగా, జయంతి నేపథ్యంలో లక్షలాది మంది భక్తులు ఉత్తర్‌ప్రదేశ్‌లోని వారణాసికి వెళ్తారని.. దీంతో ఓటు వేసే అవకాశం కోల్పోతారని పార్టీలు ఈసీకి తెలిపాయి. ఈ నేపథ్యంలో పోలింగ్‌ తేదీని వారం పాటు వాయిదా వేయాలని స్వయంగా ముఖ్యమంత్రి చరణ్‌జీత్‌ సింగ్‌ చన్నీ ఈసీకి విజ్ఞప్తి చేశారు. ప్రధాన పార్టీలైన బీఎస్పీ, భాజపా సైతం ఇదే అభిప్రాయాన్ని వ్యక్తం చేశాయి. దీంతో ఈ విషయంపై నేడు కేంద్ర ఎన్నికల సంఘం దిల్లీలో సమావేశమై నిర్ణయం తీసుకోనుంది.