TS News: రైతు పాటకు పాదాభివందనం చేసిన రేవంత్‌రెడ్డి

హైదరాబాద్ : నగరంలోని ధర్నా చౌక్‌లో రెండో రోజూ కాంగ్రెస్‌ వరి దీక్ష కొనసాగుతోంది. ఈ దీక్షకు మద్దతు ప్రకటించిన తెలంగాణ జన సమితి అధ్యక్షుడు కోదండరామ్‌.. కాంగ్రెస్‌ నేతలతో కలిసి నిరసనలో పాల్గొన్నారు.

ఈ దీక్ష సందర్భంగా.. రైతుల సమస్యలు, శాశ్వత పరిష్కారంపై అద్భుతమైన పాట పాడిన 93 ఏళ్ల రాంరెడ్డి అనే వ్యక్తిని పీసీసీ అధ్యక్షుడు రేవంత్‌ రెడ్డి అభినందించారు. వేదికపైనే ఆయనకు పాదాభివందనం చేశారు. ఎంపీ కోమటిరెడ్డి వెంకటరెడ్డి కూడా ఆయనని అభినందించి ఆలింగనం చేసుకున్నారు. ఆయన రాసిన పాటను ముద్రించి పంచి పెడతామని సభకు అధ్యక్షత వహించిన టీపీసీసీ సీనియర్ ఉపాధ్యక్షులు మల్లు రవి తెలిపారు. సాయంత్రం 5 గంటల వరకు ఈ వరి దీక్ష కొనసాగనుంది.