CM Kcr: దిల్లీ వెళ్లిన సీఎం కేసీఆర్‌ ... ప్రధాని మోదీని కలిసే అవకాశం

హైదరాబాద్‌: ముఖ్యమంత్రి కేసీఆర్‌, మంత్రులు, అధికారులు దిల్లీ చేరుకున్నారు. 3..4 రోజులు హస్తినలోనే ఉండనున్నారు. ధాన్యం కొనుగోలు వ్యవహారంపై ప్రధాని మోదీని కలిసే అవకాశముంది. వరి ధాన్యం కొనుగోళ్లతో పాటు రాష్ట్రానికి సంబంధించిన పెండింగ్‌ అంశాలు  తేల్చాలని సీఎం కోరనున్నారు. వరి ధాన్యం ఎంత కొంటారో వార్షిక లక్ష్యం చెబితే .. రాష్ట్ర రైతులకు మార్గనిర్దేశనం చేసేలా ప్రభుత్వం తగిన నిర్ణయం తీసుకోనుంది. దిల్లీ పర్యటనలో కేంద్రం స్పందన మేరకు  యాసంగి పంటలపై స్పష్టమైన ప్రకటన చేయనున్నారు. కృష్ణా జలాల్లో తెలంగాణ వాటా తేల్చాలని కోరనున్నారు. కృష్ణా ట్రైబ్యునల్‌ ఏర్పాటుపైనా చర్చలు జరపనున్నారు. గిరిజన రిజర్వేషన్లపై అసెంబ్లీలో తీర్మానం చేసినప్పటికీ కేంద్రం తేల్చడం లేదు. ఎస్సీ వర్గీకరణపైనా తేల్చాలని కోరనున్నారు. బీసీ కులగణనపైనా చర్చించే అవకాశముంది. సీఎం వెంట మంత్రులు నిరంజన్‌రెడ్డి, గంగుల కమలాకర్‌,  సీఎస్‌ సోమేశ్‌ కుమార్‌ , అధికారులు వెళ్లారు.