Votes Counting: తడిచిన బ్యాలెట్ల వాలిడేషన్‌పై నిర్ణయం రిటర్నింగ్‌ అధికారులదే: ద్వివేది

అమరావతి: రాష్ట్రంలో ఎంపీటీసీ, జడ్పీటీసీ ఎన్నికల ఓట్ల లెక్కింపు ప్రశాంతం జరుగుతోందని ఏపీ పంచాయతీరాజ్‌ శాఖ ముఖ్యకార్యదర్శి గోపాలకృష్ణ ద్వివేది చెప్పారు. 515 జడ్పీటీసీ, 7,220 ఎంపీటీసీ స్థానాల్లో లెక్కింపు కొనసాగుతోందని తెలిపారు. పలు కారణాలతో 6 చోట్ల బ్యాలెట్ పేపర్లు దెబ్బతిన్నాయన్నారు. రెండు చోట్ల చెదలు పట్టగా, మరో 4 చోట్ల తడిచిపోయాయని చెప్పారు. తడిచిన, చెదలు పట్టిన బ్యాలెట్‌ పేపర్ల వాలిడేషన్‌పై కలెక్టర్లు, రిటర్నింగ్‌ అధికారులే నిర్ణయం తీసుకుంటారన్నారు. రీపోల్‌ అవసరమనుకుంటే ఎస్‌ఈసీ తుది నిర్ణయం తీసుకుంటుందని ద్వివేది స్పష్టం చేశారు. ఎంపీటీసీ ఎన్నికల ఫలితాలు త్వరగానే వస్తాయని.. జడ్పీటీసీ ఫలితాలు వచ్చేందుకు సాయంత్రం, రాత్రి వరకు సమయం పడుతుందన్నారు.