కోహ్లీ గురించి ఆందోళన చెందాల్సిన పనిలేదు

ఇంటర్నెట్‌డెస్క్‌: టీమ్‌ఇండియా కెప్టెన్‌ విరాట్‌ కోహ్లీ గురించి ఆందోళన చెందాల్సిన అవసరం లేదని, అతడే మ్యాచ్‌ ఆడినా 110 శాతం కష్టపడతాడని ఆస్ట్రేలియా ఆల్‌రౌండర్‌ మార్కస్‌ స్టోయినిస్‌ అన్నాడు. శనివారం అతడు మీడియాతో మాట్లాడుతూ ఈ వ్యాఖ్యలు చేశాడు. ఈసారి ఆస్ట్రేలియా పర్యటనలో టీమ్‌ఇండియా సారథి తక్కువ మ్యాచ్‌లే ఆడుతున్నా.. అతడి ఆటతీరులో ఎలాంటి మార్పులు ఉండవని చెప్పాడు. వంద శాతంకిపైగా కష్టపడుతున్నప్పుడు అంతకుమించిన ఆత్మవిశ్వాసం అవసరం లేదన్నాడు. రాబోయే రోజుల్లో పరుగుల ప్రవాహం కొనసాగించడానికి సిద్ధంగా ఉంటాడని స్టోయినిస్‌ చెప్పాడు. 

‘కోహ్లీని కట్టడి చేయడానికి మా ప్రణాళికలు మాకున్నాయి. గతంలో కొన్నిసార్లు అవి పని చేశాయి. మరికొన్ని సార్లు విఫలమయ్యాయి. కానీ ఈసారి మాకు అనుకూలంగా ఫలితాలు వస్తాయని ఆశిస్తున్నా’ అని ఆస్ట్రేలియా ఆల్‌రౌండర్‌ పేర్కొన్నాడు. అనంతరం దిల్లీ క్యాపిటల్స్‌ హెడ్‌కోచ్‌ రికీపాంటింగ్‌పై స్పందిస్తూ.. అతడికి తాను వీరాభిమానినని చెప్పాడు. ఇటీవల పూర్తి అయిన 13వ సీజన్‌లో తన ఆట మెరుగవ్వడానికి సహాయం చేశాడని చెప్పాడు. ఇక ఈ సీజన్‌లో మొత్తం 17 మ్యాచ్‌లు ఆడిన స్టోయినిస్‌ 352 పరుగులు చేసి 13 వికెట్లు పడగొట్టాడు. దాంతో దిల్లీ తొలిసారి ఫైనల్స్‌ చేరడంలో తనవంతు పాత్ర పోషించాడు. ఇప్పుడు భారత్‌తో సుదీర్ఘ పర్యటనకు సిద్ధమవుతున్నాడు.