Tokyo Olympics: భజరంగ్‌ ఆశలు గల్లంతు.. ఇక మిగిలింది కాంస్యమే

టోక్యో: ఒలింపిక్స్‌లో 65 కేజీల పురుషుల ఫ్రీస్టైల్‌ రెజ్లింగ్‌ సెమీస్‌లో ఎన్నో అంచనాలు పెట్టుకున్న భారత అగ్రశ్రేణి రెజ్లర్‌ భజరంగ్‌ పునియా చేతులెత్తేశాడు. అజర్‌బైజాన్‌ రెజ్లర్‌ హాజీ అలీవ్‌ చేతిలో 5-12 తేడాతో ఓటమిపాలయ్యాడు. దాంతో భజరంగ్‌ ఇక కాంస్య పతకం కోసమే తలపడాల్సి ఉంది. శుక్రవారం జరిగిన ఈ కీలక పోరులో భజరంగ్‌ అంత దూకుడుగా ఆడలేకపోయాడు. భారత రెజ్లర్‌ బలహీనతపై దృష్టిసారించిన ప్రత్యర్థి ఏ దశలోనూ అవకాశం ఇవ్వలేదు. తన పట్టుతో తొలి రౌండ్‌లోనే 4-1 ఆధిక్యం సంపాదించిన ఆలీవ్‌ తర్వాత కూడా 8-1 ఆధిక్యంలోకి దూసుకెళ్లాడు. ఈ క్రమంలోనే భజరంగ్‌ పలుమార్లు ఆలీవ్‌ను తిప్పికొట్టే అవకాశాలు లభించినా అతడు సద్వినియోగం చేసుకోలేకపోయాడు. దాంతో మిగతా ఆటలోనూ ఆధిపత్యం చెలాయించిన ఆలీవ్‌ చివరికి విజయం సాధించాడు. ఆట 30 సెకన్లలో ముగుస్తుందనగా భజరంగ్‌ నిరుత్సాహంతో డీలా పడ్డాడు. చివరికి 5-12 తేడాతో ఓటమిపాలయ్యాడు. ఇక భజరంగ్‌ కాంస్యం కోసం తలపడాల్సి ఉంది. అతడా పతకం సాధిస్తే భారత్‌ ఈ ఒలింపిక్స్‌లో మంచి ప్రదర్శన చేసినట్టే. అంతకుముందు క్వార్టర్‌ ఫైనల్లో ఇరాన్‌కు చెందిన గియాసి చెకా మోర్తజాను భజరంగ్‌ 2-1 తేడాతో ఓడించి సెమీస్‌కు చేరిన సంగతి తెలిసిందే.

నిరాశపర్చిన సీమా బిస్లా..

మరోవైపు మహిళల 50 కేజీల ఓపెనింగ్‌ రౌండ్‌లో తొలిసారి పోటీపడిన యువ రెజ్లర్‌ సీమా బిస్లా తునీషియాకు చెందిన సారా హమ్‌దీ చేతిలో 1-3 తేడాతో ఓటమిపాలైంది. హమ్‌దీ.. తన పట్టుతో సీమాను గట్టి పోటీ ఇచ్చింది. దాంతో భారత రెజ్లర్‌ బౌట్‌లో పెద్దగా కదలలేకపోయింది. ఈ క్రమంలోనే హమ్‌దీ రెండు పుష్‌ఔట్లు చేసి ఆధిక్యం సంపాదించింది. కాగా, సీమా గత మేలో సోఫియాలో నిర్వహించిన ప్రపంచ ఒలింపిక్స్‌ క్వాలిఫయర్‌లో విజేతగా నిలిచి తొలిసారి ఒలింపిక్స్‌కు అర్హత సాధించింది.