యూఎస్‌ ఓపెన్‌పై నాలుగోసారి జకోవిచ్‌ కన్ను.. 

డబుల్స్‌లో రెండో రౌండ్‌కు చేరుకున్న బోపన్న

ఇంటర్నెట్‌డెస్క్‌: ఒకవైపు 2020లో కరోనా వైరస్‌ ప్రతాపం చూపిస్తున్నా మరోవైపు టెన్నిస్‌ దిగ్గజం నోవాక్‌ జకోవిచ్‌ వరుస విజయాలతో దూసుకుపోతున్నాడు. ఇప్పుడు నాలుగోసారి యూఎస్‌ ఓపెన్‌పై కన్నేశాడు. ప్రస్తుతం న్యూయార్క్‌లో జరుగుతున్న ఈ మెగా ఈవెంట్‌లో అతడు వరుసగా మూడో రౌండ్‌లోనూ విజయం సాధించాడు. దీంతో సింగిల్స్‌ విభాగంలో ఇంకాస్త ముందుకు వెళ్లాడు. శుక్రవారం రాత్రి జర్మనీ ఆటగాడు జాన్‌ లెర్నడ్‌తో తలపడిన మ్యాచ్‌లో జకోవిచ్‌ 6-3, 6-3, 6-1తో పూర్తి ఆధిపత్యం చెలాయించాడు. తన సర్వీసులతో ప్రత్యర్థిని ఏ మాత్రం కోలుకోనివ్వలేదు. ఈ విజయంతో వరుసగా 29 మ్యాచ్‌లు గెలుపొందాడు సెర్బియన్‌ స్టార్‌. అలాగే ఈ సీజన్‌లో 26-0 విజయాలతో దూసుకుపోతున్నాడు. జకోవిచ్‌ ఇప్పటికే 2011, 2015, 2018లో మూడుసార్లు ఈ కప్పును అందుకున్న సంగతి తెలిసిందే.

మరోవైపు పురుషుల డబుల్స్‌ విభాగంలో ఇండో కెనడియన్‌ జోడీ రోహన్‌ బోపన్న, డెనిస్‌ షాపొవాలో రెండో రౌండ్‌కు చేరుకుంది. వీరిద్దరూ అమెరికన్‌ జోడీ ఎర్నెస్టో, రూబిన్‌పై గెలుపొందారు. 6-2, 6-4 తేడాతో విజయం సాధించారు. ఇక మహిళల సింగిల్స్‌ విభాగంలో నంబర్‌ వన్‌ క్రీడాకారిణి అయిన జపాన్‌ స్టార్‌ నవోమి ఒసాకా నాలుగో రౌండ్‌కు చేరింది. శుక్రవారం ఉక్రెయిన్‌ స్టార్‌ మార్తా కోస్త్యుక్‌తో తలపడిన మూడో రౌండ్‌లో 6-3, 6-7 (4), 6-2 తేడాతో ఒసాకా విజయం సాధించింది.