పావెల్‌ విధ్వంసం

ఇంగ్లాండ్‌పై విండీస్‌ విజయం

బ్రిడ్జ్‌టౌన్‌: రోమన్‌ పావెల్‌ (107; 53 బంతుల్లో 4×4, 10×6) విధ్వంసక శతకంతో చెలరేగడంతో ఇంగ్లాండ్‌తో మూడో టీ20లో ఆతిథ్య వెస్టిండీస్‌ 20 పరుగుల తేడాతో విజయం సాధించింది. మొదట విండీస్‌ 20 ఓవర్లలో 5 వికెట్లకు 224 పరుగుల భారీ స్కోరు చేసింది. పావెల్‌ సెంచరీ సాధించగా... పూరన్‌ (70; 43 బంతుల్లో 4×4, 5×6) మెరుపు ఇన్నింగ్స్‌ ఆడాడు. మూడో వికెట్‌కు  పూరన్‌తో కలిసి పావెల్‌ 122 పరుగులు జోడించాడు. భారీ ఛేదనలో ఇంగ్లాండ్‌ పోరాడినా 20 ఓవర్లలో 9 వికెట్లకు 204 పరుగులే చేయగలిగింది. టామ్‌ బాంటన్‌ (73; 39 బంతుల్లో 3×4, 6×6), ఫిల్‌ సాల్ట్‌ (57; 24 బంతుల్లో 3×4, 5×6) మెరిసినా జట్టును గెలిపించలేకపోయారు. విండీస్‌ బౌలర్లలో షెపర్డ్‌ (3/59), పొలార్డ్‌ (2/31) ప్రత్యర్థిని కట్టడి చేశారు. ఈ విజయంతో అయిదు టీ20ల సిరీస్‌లో విండీస్‌ 2-1 ఆధిక్యంలో నిలిచింది.