Sachin Tendulkar: సచిన్‌ తెందూల్కర్‌ బలహీనతను బయటపెట్టిన మురళీధరన్‌

ఇంటర్నెట్ డెస్క్‌: ఎంత గొప్ప ఆటగాడికైనా చిన్న చిన్న బలహీనతలు ఉంటాయి. క్రికెట్‌ దిగ్గజం సచిన్‌ తెందూల్కర్‌కి కూడా ఆఫ్ స్పిన్‌ ఆడటంలో చిన్న బలహీనత ఉందని శ్రీలంక మాజీ స్పిన్నర్‌ ముత్తయ్య మురళీధరన్ అన్నాడు. ‘‘సచిన్ తెందూల్కర్‌కు బౌలింగ్ చేయాలంటే నాకు భయం ఉండదు. ఎందుకంటే అతడు ఎక్కువగా హిట్టింగ్ చేయడు. కానీ, సెహ్వాగ్ హిట్టింగ్ చేస్తాడు. సచిన్ తెందూల్కర్ తన వికెట్‌ని కాపాడుకుంటాడు. బంతి ఎటువైపు వస్తుంది అనే విషయాన్ని బాగా అర్థం చేసుకుంటాడు. అతడికి టెక్నిక్ తెలుసు” అని ముత్తయ్య మురళీధరన్ అన్నాడు.

"సచిన్‌ లెగ్ స్పిన్‌లో మెరుగ్గా ఆడగలడు. ఆఫ్ స్పిన్‌ బౌలింగ్‌ని ఎదుర్కోవడానికి కాస్త ఇబ్బంది పడతాడు. ఎందుకంటే అతడిని నేను చాలాసార్లు అవుట్ చేశాను. అంతేకాదు.. చాలా మంది ఆఫ్ స్పిన్నర్లు అతడిని పెవిలియన్‌కి పంపించడాన్ని చుశా. దీంతో ఆఫ్ స్పిన్‌ ఆడటంలో సచిన్‌కి  కొంచెం బలహీనత ఉందని భావించా. దీని గురించి నేను అతడితో ఎప్పుడూ మాట్లాడలేదు. సచిన్‌ బలహీనత ఏంటో తెలుసు కాబట్టి ఇతర బౌలర్లతో పోల్చితే ఎక్కువసార్లు అతడిని ఔట్‌ చేశా. ఏదేమైనా సచిన్‌ కఠినమైన ఆటగాడు. అతడి వికెట్‌ని సాధించడం చాలా కష్టం’’ అని ముత్తయ్య వివరించాడు.