IPL 2022: అక్టోబర్‌ 17న ఐపీఎల్‌ 2022 కొత్త జట్ల ఎంపిక!

ఇంటర్నెట్‌డెస్క్‌: ఐపీఎల్‌ 2022లో రెండు కొత్త జట్లు రాబోతున్నాయనే సంగతి తెలిసిందే. ఇప్పటికే ఎనిమిది ఫ్రాంఛైజీలతో దిగ్విజయంగా సాగుతున్న మెగా టీ20 లీగ్‌.. వచ్చే ఏడాది నుంచి మరింత పెద్దదికానుంది. అందుకు సంబంధించిన ఏర్పాట్లు కూడా చకాచకా జరుగుతున్నాయి. ఈ క్రమంలోనే బీసీసీఐ ఇటీవల రాబోయే రెండు కొత్త ఫ్రాంచైజీలు, ఆయా జట్ల నిర్వహణ కోసం టెండర్లు విడుదల చేసింది. అక్టోబర్‌ 5న ఆ గడువు ముగుస్తుంది. ఈ నేపథ్యంలోనే ఆ కొత్త జట్ల ఆటగాళ్ల వేలం పాటను అక్టోబర్‌ 17న నిర్వహిస్తున్నారని సమాచారం. అహ్మదాబాద్‌, లఖ్‌నవూ, పుణె.. వాటికి సొంత వేదికలుగా ఖరారయ్యే వీలుంది. దీంతో వచ్చే ఏడాది నుంచి ఐపీఎల్‌లో మొత్తం పది జట్లు సందడి చేయనున్నాయి. మరోవైపు ఐపీఎల్‌ 2021లో మిగిలిన సీజన్‌ వచ్చే ఆదివారం నుంచి తిరిగి మొదలవుతుండగా అక్టోబర్‌ 15న ఫైనల్‌ మ్యాచ్‌ జరగనుంది. అది అయిపోయిన రెండు రోజులకే ఐపీఎల్‌ 2022కు సంబంధించిన కొత్త జట్ల వివరాలు వెలువడే అవకాశం ఉంది. అయితే, దీనిపై అధికారిక ప్రకటన రావాల్సి ఉంది.