Updated : 26/08/2021 23:33 IST

INDvsENG: రూట్‌ శతకమోత.. సంపూర్ణ ఆధిక్యంలో ఇంగ్లాండ్‌

రెండో రోజు ఆటపూర్తయ్యేసరికి ఇంగ్లాండ్‌ 423/8

ఇంటర్నెట్‌డెస్క్‌: భారత్‌తో జరుగుతున్న మూడో టెస్టు తొలి ఇన్నింగ్స్‌లో ఇంగ్లాండ్‌ సంపూర్ణ ఆధిక్యంలో నిలిచింది. రెండో రోజు ఆట పూర్తయ్యేసరికి ఆ జట్టు 423/8 స్కోర్‌తో నిలిచి మ్యాచ్‌పై పూర్తి పట్టుసాధించింది. రెండో రోజు చివరి సెషన్‌ మినహా భారత బౌలర్లు పెద్దగా రాణించలేకపోయారు. ఈ క్రమంలోనే తొలి ఇన్నింగ్స్‌లో ఆ జట్టు ఇప్పటికే 345 పరుగుల భారీ ఆధిక్యంలో కొనసాగుతోంది. ఇక మూడో రోజు ఉదయం వేళ టీమ్‌ఇండియా ఆ చివరి రెండు వికెట్లను ఎంత వీలైతే అంత త్వరగా తీయాలి. ఆపై రెండో ఇన్నింగ్స్‌లో భారత బ్యాట్స్‌మెన్‌ ఏ మేరకు పోరాడతారో చూడాలి. ఇక గురువారం ఆట నిలిచిపోయేసరికి ఇంగ్లాండ్‌ బ్యాట్స్‌మెన్‌ క్రేగ్‌ ఓవర్టన్‌(24; 31 బంతుల్లో 4x4), రాబిన్‌సన్‌(0) క్రీజులో ఉన్నారు. అంతకుముందు కెప్టెన్‌ జోరూట్‌ (121; 165 బంతుల్లో 14x4), వన్‌డౌన్‌ బ్యాట్స్‌మన్‌ డేవిడ్‌ మలన్‌ (70; 128 బంతుల్లో 11x4) భారీ స్కోర్లు సాధించారు. వీరిద్దరూ మూడో వికెట్‌కు 139 పరుగులు జోడించి ఇంగ్లాండ్‌ను తిరుగులేని స్థితిలో నిలిపారు.

ఇక 120/0 ఓవర్‌నైట్‌ స్కోర్‌తో రెండోరోజు ఆట ప్రారంభించిన ఓపెనర్లు రోరీబర్న్స్‌(61; 153 బంతుల్లో 6x4, 1x6), హసీబ్‌ హమీద్‌(68; 195 బంతుల్లో 12x4) అర్ధశతకాలతో రాణించారు. వీరిద్దరూ తొలిసెషన్‌లోనే స్వల్ప వ్యవధిలో ఔటైనా రూట్‌, మలన్‌ మరో వికెట్‌ పడకుండా తొలి సెషన్‌ను ముగించారు. అప్పటికీ జట్టు స్కోర్‌ 182/2గా నమోదైంది. అనంతరం రెండో సెషన్‌లో మరింత వేగంగా ఆడిన ఇద్దరూ అర్ధశతకాలు సాధించడంతో పాటు శతకాల వైపు దూసుకెళ్లారు. అయితే, సిరాజ్‌ వేసిన 94వ ఓవర్‌ చివరి బంతికి మలన్‌ కీపర్‌కు క్యాచ్‌ ఇచ్చి ఔటయ్యాడు. దాంతో ఇంగ్లాండ్‌ 298 పరుగుల వద్ద మూడో వికట్‌ కోల్పోయింది. అప్పటికే ఇంగ్లాండ్‌ పటిష్ఠస్థితిలో నిలిచింది. టీ బ్రేక్‌ అనంతరం రూట్‌ శతకం పూర్తి చేసుకోగా తర్వాత ఇంగ్లాండ్‌ వరుసగా నాలుగు వికెట్లు కోల్పోయింది. బెయిర్‌స్టో(29), బట్లర్‌(7)ను షమి ఔట్‌ చేశాడు. ఆపై  రూట్‌ను బుమ్రా, మొయిన్‌ అలీ(8)ని జడేజా పెవిలియన్‌ పంపారు. మ్యాచ్‌ ముగిసేముందు సామ్‌కరన్‌(15) సిరాజ్‌ బౌలింగ్‌లో ఔటయ్యాడు. దాంతో ఇంగ్లాండ్‌ ఎనిమిది వికెట్లు కోల్పోయింది. ఈ క్రమంలోనే ఓవర్టన్‌, రాబిన్‌సన్‌ నాటౌట్‌గా నిలిచారు. భారత బౌలర్లలో షమి మూడు.. సిరాజ్‌, జడేజా చెరో రెండు.. బుమ్రా ఒక వికెట్‌ తీశారు.

రూట్‌ శతకాల రికార్డు..

మరోవైపు ఇంగ్లాండ్‌ కెప్టెన్‌ జోరూట్‌.. ఈ సిరీస్‌లో వరుసగా మూడు టెస్టుల్లోనూ సెంచరీలు బాదాడు. దాంతో భారత్‌పై అత్యధిక శతకాలు బాదిన ఐదో క్రికెటర్‌గా అతడు కొత్త రికార్డు సృష్టించాడు. ఇంతకుముందు గ్యారీసోబర్స్‌, వీవ్‌రిచర్డ్స్‌, రికీపాంటింగ్‌, స్టీవ్‌స్మిత్‌ తలా ఎనిమిది శతకాలు సాధించారు. ఇప్పుడు వారి సరసన రూట్‌ కూడా చోటు దక్కించుకోవడం విశేషం.

Read latest Sports News and Telugu News

 Follow us on Facebook, Twitter, Instagram, Koo, ShareChat and Google News. Subscribe our Telegram Channel.

Advertisement

Tags :

మరిన్ని

జిల్లా వార్తలు

సినిమా

మరిన్ని

బిజినెస్

మరిన్ని

పాలిటిక్స్

మరిన్ని

వెబ్ ప్రత్యేకం

మరిన్ని

జాతీయం

మరిన్ని

జనరల్

మరిన్ని