MS Dhoni: ధోనీ చెబుతున్న జీవిత పాఠం.. వైరల్‌గా మారిన ‘లెస్సన్‌ 7’ యాడ్‌

ఇంటర్నెట్‌ డెస్క్‌: టీమిండియా మాజీ కెప్టెన్‌ మహేంద్ర సింగ్‌ ధోనీ తాజాగా ఆన్‌లైన్‌ ఎడ్యుకేషనల్‌ టెక్నాలజీ సంస్థ ‘అన్‌అకాడమీ’ యాడ్‌ ఫిల్మ్‌లో మెరిశారు. ఇందులో గొప్పేం ఉంది.. ఇంతకుముందూ అనేక ప్రకటనలు చేశారు కదా అనుకోవచ్చు! కానీ.. దీనికో ప్రత్యేకత ఉంది. ఈ ప్రకటనను రూపొందించేందుకు దాదాపు ఏడాది పట్టడం గమనార్హం. బెంగళూరుకు చెందిన ఈ సంస్థ.. ‘లెస్సన్‌ 7’ పేరిట రూపొందించిన ఈ స్ఫూర్తిదాయక ప్రకటనను సోమవారం విడుదల చేసింది.

వెనుక రైలు వస్తుండగా.. ధోనీ  పట్టాలపై పరిగెత్తుతూ ఎదుట వస్తున్న అడ్డంకులను దాటుకుంటూ చివరకు తన లక్ష్యాన్ని అందుకుంటున్నట్లు ఇందులో చూపించారు. ‘లక్ష్యంపై చూపు.. అడ్డంకులను ఛేదించాలనే సంకల్పం.. ఛాంపియన్‌ని చేస్తుంది! ఈ అంతర్జాతీయ విద్యాదినోత్సవం సందర్భంగా.. కష్ట సమయాల్లో ‘లెస్సన్‌ 7’ను గుర్తుచేసుకోండి’ అంటూ సంస్థ ఈ యాడ్‌ను ట్వీట్‌ చేసింది. ‘మాకు సంబంధించిన వాటిలో ఇప్పటివరకు అత్యంత ప్రతిష్ఠాత్మక, ఐకానిక్ యాడ్‌ ఇది. దీన్ని రూపొందించేందుకు దాదాపు ఏడాది పట్టింది’ అని సంస్థ సీఈఓ గౌరవ్‌ ముంజల్‌ వెల్లడించారు.

ధోనీ స్టైలిష్ లుక్స్‌, స్పెషల్‌ ఎఫెక్ట్స్‌తో ఆకట్టుకుంటున్న ఈ ప్రకటన ప్రస్తుతం సామాజిక మాధ్యమాల్లో వైరల్‌గా మారింది. ట్విటర్‌లో దాదాపు 15 లక్షలకుపైగా వ్యూస్‌ వచ్చాయి. మాజీ క్రికెటర్‌ వీరేంద్ర సెహ్వాగ్‌ ఈ యాడ్‌ను పోస్ట్‌ చేస్తూ.. హెలికాప్టర్‌ షాట్‌లాగే ఇది కూడా అద్భుతంగా ఉందంటూ ధోనీకి కితాబిచ్చారు. ప్రముఖ కామెంటేటర్‌ హర్షా భోగ్లే, సినీ నటి సమంత తదితరులూ దీన్ని ట్వీట్‌ చేశారు.