39% ఒంటరితనంతోనే

కొవిడ్‌ విజృంభణతో ఉద్యోగ తీరుతెన్నులు పూర్తిగా మారిపోయాయి. ఇంటి నుంచే పని. సహోద్యోగులతో ముఖాముఖి సంభాషణ గగనమైపోయింది. డిజిటల్‌ సంబంధాల ప్రాధాన్యం పెరిగిపోయింది. ఐటీ ఉద్యోగుల్లో చాలామంది.. అంటే దాదాపు 61% మంది వీటికి అనుగుణంగా మారారు గానీ ఇప్పటికీ 39% మంది ఒంటరితనం భావనతోనే గడుపుతున్నారు. ప్రముఖ  సైబర్‌ భద్రత సంస్థ కాస్పర్‌స్కీ నిర్వహించిన సర్వేలో వెల్లడైన విషయమిది. డిజిటల్‌ సమాచార సాధన సంపత్తికి అలవాటు పడినవారిలో చాలామంది కంపెనీ సర్వీసులకు బదులు ప్రైవేటు సేవలను వినియోగించుకుంటుండటం గమనార్హం. ఇది ఆయా కంపెనీల భద్రతకు ముప్పు తెచ్చిపెట్టే ప్రమాదముందని భావిస్తున్నారు. ఇక ఒంటరితనంతో బాధపడుతున్నామని అనుకునేవారిలో తీవ్రమైన ఒత్తిడి, ఆందోళన, ఆగ్రహం కట్టలు తెంచుకోవటం వంటివి తలెత్తొచ్చు. ఇవి పై అధికారులకు ఇబ్బందికరంగానూ పరిణమించొచ్చు.