నిఖత్‌ మెరుపులు మొదలైందిక్కడే!

ఈనాడు, నిజామాబాద్‌: మూడు షట్టర్‌ గదులతో కూడిన ఈ రేకుల షెడ్డే.. ఔత్సాహిక యువతను బాక్సింగ్‌లో అంతర్జాతీయ క్రీడాకారులుగా తీర్చిదిద్దుతున్న కర్మాగారమంటే నమ్మబుద్ధి కాదు. ప్రపంచ మహిళల బాక్సింగ్‌ ఛాంపియన్‌షిప్‌లో స్వర్ణం సాధించిన నిఖత్‌ జరీన్‌ సహా మరో అయిదుగురు అంతర్జాతీయ, 25 మంది జాతీయస్థాయి క్రీడాకారులు తొలుత ఇక్కడ శిక్షణ పొందినవారే. నిజామాబాద్‌లోని డీఎస్‌ఏ మైదానంలో 80 ఏళ్ల వయసున్న బాక్సింగ్‌ శిక్షకుడు సంసముద్దీన్‌ దీన్ని నడిపిస్తున్నారు. అరకొర వసతులున్నా.. తనకున్న అనుభవాన్ని జోడించి క్రీడాకారులను సాన పడుతున్నారు. నిఖత్‌ జరీన్‌ సైతం 2009-2012 మధ్య ఇక్కడే తర్ఫీదు పొందారు. రాష్ట్ర ప్రభుత్వం జిల్లాకో బాక్సింగ్‌ అకాడమీని కేటాయించి, తగిన వసతులు కల్పించి, ఆసక్తిగల యువతను ప్రోత్సహించాలని ఆయన కోరుతున్నారు.