సాగు పాఠాలు వెదజల్లుతూ...

ఆమె చదువుకోలేదు.. కానీ ఆమె చేసిన ఆ ప్రయోగాలని మాత్రం వ్యవసాయ అధికారులు శెభాష్‌ అంటున్నారు. కూలీల కొరతని ఎదుర్కోవడానికి.. పంటలో అధిక దిగుబడులు సాధించడానికీ లక్ష్మి చేసిన ఆ ప్రయోగమేంటో తెలుసుకుందాం...
పెద్ద చదువులకూ, ఔరా అనిపించే ప్రయోగాలకు సంబంధం లేదని నిరూపించారు రూపురెడ్డి లక్ష్మి. కరీంనగర్‌ జిల్లా కొండపల్కలకు చెందిన ఈమె పెద్దగా చదువుకోలేదు.. వ్యవసాయ కుటుంబంలో పుట్టింది. వరిపంటలో ఎదురయ్యే కూలీల కొరతను ఎదుర్కోవడానికీ, పంట పెట్టుబడిని తగ్గించుకోవడానికి ఆమె కొన్ని ప్రయోగాలు చేసింది. ఇందుకుగాను భారతీయ వ్యవసాయ పరిశోధనా మండలి 92వ దినోత్సవం సందర్భంగా ఐసీఏఆర్‌-జగ్జీవన్‌రామ్‌ అభినవ్‌ పురస్కార్‌ని అందుకున్నారామె. అంతటితో ఆగిపోకుండా వ్యవసాయంలో తాను నేర్చుకున్న మెలకువలని తోటి రైతులకు నేర్పేందుకు ఉపన్యాసకురాలి అవతారమెత్తారు. దాంతో లక్ష్మి పొలమే ఓ పెద్ద ప్రయోగశాలగా మారిపోయింది. వివిధ జిల్లాల నుంచి రైతులు వచ్చి ఆమె చేసే విధానాన్ని పరిశీలించి వెళుతున్నారిప్పుడు.

కూలీల కొరతను అధిగమించిందిలా...

లక్ష్మిది 15 ఎకరాల వరిసాగు. సాధారణంగా వరి పండించేందుకు రైతులు నారు పోసి పొలం దున్ని కూలీలతో నాట్లు వేయిస్తుంటారు. ఇక్కడే అసలు ఇబ్బంది ఎదురయ్యేది ఆమెకు. గ్రామీణ ప్రాంతాల్లో అంతా ఒకేసారి నాట్లు వేస్తారు కాబట్టి ఆ సమయంలో కూలీల కొరత ఎదురయ్యేది. ఈ సమస్యను అధిగమించేందుకు లక్ష్మి వరి విత్తనాలని నేరుగా వెదజల్లే ప్రయోగానికి శ్రీకారం చుట్టారు. దీంతో నాలుగైదు బస్తాలు అధికంగా పండిస్తున్నారామె. ప్రతి సీజన్‌లోనూ 450 నుంచి 500 క్వింటాళ్ల ధాన్యం పండిస్తారామె. రబీ సీజన్‌లో ట్రాక్టర్‌తో ఒకరోజు పొలం దున్ని ఒక రోజు నానబెట్టి, మొలకగట్టిన విత్తనాలను పొలంలో వెదజల్లుతారు. ప్రధాన పొలంలో కొత్త మొలక వచ్చే వరకు ఎదురు చూసి అవసరాన్ని బట్టి నీరు పెడుతుంటారు. లక్ష్మి అవలంభిస్తున్న పద్ధతుల వల్ల ఎకరాకు రూ.7 వేల నుంచి రూ. 8 వేల వరకు ఖర్చు తగ్గుతుందని 15 ఎకరాల్లో దాదాపు లక్షరూపాయల వరకు ఖర్చు తగ్గిందని గర్వంగా చెబుతోంది లక్ష్మి.

తరగతులు చెప్పే స్థాయికి...

లక్ష్మి అనుసరిస్తున్న విధానాలని తొలుత కరీంనగర్‌ వ్యవసాయాధికారులు ఆ తర్వాత పొలాస వ్యవసాయ శాస్త్రవేత్తలు..జమ్మికుంట కృషివిజ్ఞాన కేంద్రం శాస్త్రవేత్తలు పరిశీలించడమే కాకుండా ప్రయోగాత్మకంగా ఈ విధానంతో వ్యవసాయ విశ్వవిద్యాలయంలో కూడా పంటలు పండించడం విశేషం. ఆ తర్వాత రైతులకు అవగాహన కల్పించేందుకు అక్కడికి ఆహ్వానిస్తున్నారు. రైతుల అవగాహన కార్యక్రమాల్లో లక్ష్మితో వ్యవసాయ పాఠాలు చెప్పిస్తూ రైతుల్లో చైతన్యం నింపుతున్నారు.

-ఎం.డి.అలీముద్దీన్‌, కరీంనగర్‌

Tags :