గాజుపాత్రల్లో కానుకలిద్దామనుకుంటున్నా!

నేను బీటెక్‌ చదువుతున్నా. నాకు గార్డెనింగ్‌ చేయడం అంటే చాలా ఇష్టం. స్నేహితులు, బంధువుల ఇళ్లల్లో జరిగే వేడుకులకు మొక్కల్ని కానుకగా ఇవ్వాలనుకుంటున్నా. వీటి గురించి తెలుసుకుంటున్నప్పుడు గాజు పాత్రల్లో అమర్చిన మొక్కలు నన్నెంతగానో ఆకర్షించాయి. కొందామని అడిగితే చాలా ఖరీదు చెప్పారు. వీటిని ఇంట్లోనే తయారు చేసుకోవచ్చా? ఇందుకోసం ఎలాంటి జాగ్రత్తలు తీసుకోవాలి?

- మాన్విత, హైదరాబాద్‌

గాజు పాత్రల్లో అమర్చిన మొక్కలను టెర్రారియం అంటారు. ఇవి కానుకలుగా ఇవ్వడానికి, అలంకరణలో వినియోగించడానికి బాగుంటాయి. కాస్త శ్రద్ధపెడితే వీటిని సులువుగానే ఇంట్లో తయారు చేసుకోవచ్చు.అయితే కొన్ని మెలకువలు పాటించాలి. ఇందుకోసం కోనికల్‌ ప్లాస్క్‌, అక్వేరియం, ఫిష్‌బౌల్‌, బీకర్‌ వంటి పారదర్శకంగా ఉండే గాజు పాత్రల్ని వాడొచ్చు. సింగోనియా, సాన్సివేరియా, మనీప్లాంట్‌, ఫెర్న్స్‌, పిటూనియా, బేబీ టియర్స్‌ వంటి మొక్కల్ని పెంచుకోవచ్చు.
ఎలా నాటుకోవాలంటే... గాజుపాత్ర ముందు భాగంలో పొట్టిమొక్కలు తర్వాత పొడవు రకాల్ని నాటాలి. పాత్ర అడుగున అధికంగా ఉన్న నీరు పోయేలా పగిలిన మట్టి పెంకులు, బొగ్గులను పొరలా వేయాలి. దానిపై ఎర్రమట్టి, ఇసుక సేంద్రియ ఎరువులను సమపాళ్లలో కలిపిన మిశ్రమాన్ని ఒకటిన్నర నుంచి రెండు అంగుళాల మందంలో వేసుకోవాలి. ఆపై మట్టిని తడిపి మొక్కల్ని నాటుకోవాలి. మొక్కల నుంచి ఆవిరైన తేమ గాజుపాత్ర గోడలపై నిలిచి తిరిగి అడుగుకు చేరి వేర్లకు అందుతుంది. కాబట్టి తరచుగా నీటిని పెట్టాల్సిన అవసరం ఉండదు. ఎండ నేరుగా తగలకుండా ఉంటే చాలు. రాళ్లు, చిన్న చిన్న బొమ్మలు, గవ్వలు వంటి ఇతర అలంకరణ వస్తువులు పెట్టి దీన్ని అందంగా తీర్చిదిద్దుకోవచ్చు.